Belgiyada sifatsiz go‘sht mahsulotlari bilan bog‘liq mojaro chiqdi

Belgiyada sifatsiz va muddati o‘tib ketgan go‘sht mahsuloti bilan bog‘liq mojaro chiqdi. Mamlakat qishloq xo‘jaligi vaziri Deni Dyukarm va Oziq-ovqat xavfsizligi federal agentligi (AFSCA) ko‘rsatmasiga ko‘ra, qiyma ishlab chiqarishga ixtisoslashgan Veviba kompaniyasining mahsulotlari do‘kon peshtaxtalaridan olindi.

Ma'lum qilinishicha, bu chora Verve shahrida go‘sht mahsulotini nimtalash va muzlatish jarayonida iste'molchilar salomatligiga zarar yetkazuvchi qoidabuzarliklar aniqlanganidan keyin ko‘rilgan.

Jumladan, Belgiyada xom holda tanovul qilinadigan “ameriken” farshida ishlab chiqarish va odam iste'moli uchun taqiqlangan go‘sht chiqindilari aniqlangan. Bundan tashqari, kompaniya go‘shtlarning muzlatilishi sanasi haqida noto‘g‘ri ma'lumotlarni ko‘rsatgan.

Sifatsiz qiymani iste'mol qilish oqibatida ich buzilishi yuz berganlarga zudlik bilan shifokorlarga murojaat qilish tavsiya qilingan.

Veviba hissasiga Belgiyada ishlab chiqariluvchi go‘sht mahsulotining uchdan biri to‘g‘ri keladi. Sanitar-epidemiologik talablar buzilgani sababli kompaniyaning litsenziyasi vaqtinchalik qaytarib olingan.

2017 yil iyul-avgustda Belgiya va Yevropa Ittifoqining 24 ta davlatida do‘kon peshtaxtalarida fipronil zararli moddasi bilan zaharlangan tuxum va mahsulotlar paydo bo‘lishi bilan bog‘liq “tuxum inqirozi” avj olgandi.

Mutaxassislar bu moddani saqlovchi tuxumlarning ko‘p miqdorda iste'mol qilinishi salomatlik uchun xavfli ekanidan ogohlantirishgan. Sifatsiz mahsulot yo‘q qilinishi oqibatida ishlab chiqaruvchilar o‘nlab million yevro zarar ko‘rishgan.