Skripal zaharlanishi yuz bergan kun haqida yangi ma'lumot paydo bo‘ldi

Britaniyaning Solsberida GRU sobiq polkovnigi Sergey Skripal va uning qizi Yuliya zaharlanish bilan bog‘liq hodisa yuz bergan kunda to‘rt soatga o‘z telefonidagi GPS’ni o‘chirib qo‘ygan. Bu haqda The Times o‘z manbalariga asosan xabar bermoqda.

Ta'kidlanishicha, bunday holat bir narsadan darak beradi – Skripallar kim bilandir maxfiy uchrashuv o‘tkazishgan bo‘lishi mumkin. Skotlend-Yard politsiyachilari ushbu ma'lumotlarga hech qanday izoh berishmadi.

Eslatib o‘tamiz, avvalroq «Bi-bi-si» telekanali Skripal Putinga xat yuborib, kechirishni so‘ragani haqida xabar bergandi. Xabar qilinishicha, Skripal o‘zini sotqin deb hisoblamagan, sababi «u Rossiyaga emas, balki Sovet Ittifoqiga, sotsialistik vataniga sodiq bo‘lish haqida qasamyod keltirgan». Aytilishicha, Skripal Rossiya prezidenti Vladimir Putinga maktub yuborib, unda «butunlay kechirish» va vatanga qaytish imkoniyatini taqdim etishni so‘ragan.