DXX raisi O‘zbekistonga tahdid qiluvchi omillarni bildirdi

O‘zbekistonda tinchlik va barqarorlikni ta'minlash, mamlakatni nafaqat tashqi, balki ichki tahdidlardan himoya qilish dolzarb vazifalardandir. Ana shunday omillarning mavjudligi xavfsizlikni ta'minlash sohasini takomillashtirishni taqozo etdi. Shu maqsadda Davlat xavfsizlik xizmati faoliyati takomillashtirildi, deb yozadi Kun.uz muxbiri.

Davlat xavfsizlik xizmati raisi Ixtiyor Abdullayev O‘zbekistonga qo‘shni davlatning shimoliy hududida IShID, Tolibonlar harakati, Turkiston islom harakati va boshqa bir qator jangari guruhlarning faollashuvi, jangovar harakatlarda qatnashgan Markaziy Osiyo davlatlaridan chiqqan jangarilar turli davlatlar orqali O‘zbekistonga qaytib kelayotgani masalasi yangi tahdidlarga sabab bo‘layotganini bildirdi.

«​Undan tashqari qo‘shni davlatlar bilan chegaralarning ochilishi, O‘zbekistonga kelayotgan shubhali sarmoyador va sayyohlar sonining kun sayin ortib borayotgani, shuningdek diniy ekstremistik ruhdagi adabiyotlar, giyohvandlik vositalari, qurol-yarog‘larni olib kirishga urinishlar ehtimoli kuchayib borayotgani ma'lum darajada ma'lum tahdidlarni yuzaga keltirmoqda.

Bundan tashqari, tahdidlar shaklan turli separatistik kuchlarning faollashuvi, ularning ayrim chet el maxsus xizmatlari tomonidan moliyalashtirilayotganligida ham namoyon bo‘lmoqda. Diniy sohada berilgan erkinliklarni ayrimlar noto‘g‘ri talqin qilayotgani oqibatida, diniy aqidaparastlikning kuchayib borayotganligi, ayrim hududlarda salafiylik oqimiga kirib qolayotganlar, soqol qo‘yishni o‘ziga odat qilib, turli oqimlarga kirishga harakat qilayotgan shaxslar uchrab turibdi»​, deydi Abdullayev.

Ma'lumot uchun, «O‘zbekiston Respublikasi Davlat xavfsizlik xizmati to‘g‘risida»gi O‘zbekiston Respublikasi Qonuni 9ta bob va 48ta moddadan iborat bo‘lib, mazkur xizmat faoliyatining huquqiy asoslarini yaratib beradi.