Rossiya Suriyada kimyoviy qurol qo‘llangani haqidagi xabarlarni rad etdi

Rossiyalik harbiylar Suriya armiyasi tomonidan Sharqiy G‘uta hududida, Duma shahridagi jangarilarga qarshi kimyoviy qurol (xlorli bomba) qo‘llangani haqidagi xabarlarni rad etdi.

«Bu ma'lumot qat'iyan rad etiladi», deya Suriyadagi ziddiyatli tomonlarni yarashtiruv markazi boshlig‘i general-mayor Yuriy Yevtushenkoning so‘zlarini keltirgan «Interfaks» agentligi.

«Duma ozod etilganidan keyin, u yerga rossiyalik mutaxassislarni yuborib, faktlar yig‘ib, bu ma'lumot to‘qib chiqarilganini tasdiqlashimiz mumkin», degan u.

Yevtushenko «qator G‘arb davlatlari» Dumadan jangarilarni siqib chiqarish amaliyotlariga to‘sqinlik qilishga harakat qilayotganini qayd etib o‘tgan. «Bunday paytda G‘arb Suriya Arab Respublikasi hukumati kimyoviy qurol qo‘llaganini iddao etishga tushadi», deya davom etgan u.

General Suriya harbiylari Dumaga xlorli bomba tashlagani haqida xabar tarqatgan manbalar, xususan, «Oq kaskalilar» ko‘ngilli guruhi bundan avval ham yolg‘on xabarlar tarqatganligini eslatib o‘tdi.

6 aprel kuni Suriya hukumati harbiylari Dumani, Sharqiy G‘utadagi Bashar Asad nazorati ostida bo‘lmagan oxirgi shaharni ozod qilish uchun harakat boshladi.

7 aprel kuni ushbu shaharga kimyoviy hujum uyushtirilgani oqibatida 70 kishi, jumladan bolalar halok bo‘lgani to‘g‘risida xabarlar tarqaldi. AQSh bunday ehtimoliy hujum uchun javobgarlikni Bashar Asad hukumatini qo‘llab kelayotgan Rossiyani aybladi.