«Misrlik Messi» ushbu mavsumda aql bovar qilmas darajada o‘yin ko‘rsatmoqda va bunga uning ajoyib statistikasi ham dalolat qilmoqda. Agar «Liverpul»ning so‘nggi yillardagi eng yaxshi hujumchilari bilan solishtirsak, Saloh Torres (ilk mavsumda barcha musobaqalarda 33 gol) va Suaresdan (31 gol) yaxshiroq ko‘rsatkich qayd etib ulgurdi.
Muhammad Saloh Premer Liga futbolchilari orasidagi so‘rovnoma bo‘yicha tuzilgan ramziy terma jamoadan ham joy oldi. Ushbu jamoaga kiritilgan 6 futbolchi (Keyn, Eriksen, Silva, De Bryuyne, De Xea va Saloh) ushbu mavsumdagi APLning eng yaxshi futbolchisi bo‘lishga da'vogarlik qilmoqda. So‘nggi yillarda asosan chempion jamoa tarkibidagi futbolchiga topshirilgan bu sovrin bu safar istisno holatida «Liverpul» hujumchisiga tegishi mumkin. «Manchester Siti» tarkibida De Bryuyne, Silva kabi futbolchilar ajoyib o‘yin ko‘rsatayotganliklariga qaramasdan, Salohning bu raqobatda peshqadam ekani haqiqatan ham katta natija. Va bu shunchaki, aldov emas, raqamlarga murojaat qilganimizda ham, 25 yoshli hujumchining ko‘rsatkichlari e'tiborga molik.
1. Bir mavsumda urgan gollari soni bo‘yicha eng yaxshi afrikalik futbolchi
Muhammad Saloh 30 gol urishga erishib bo‘ldi, bu APLda shu paytgacha to‘p surgan afrikalik futbolchilar ichida eng yaxshi natijadir. Afsonaviy Drogba 2009/10 yilgi mavsumda 29 gol urgandi. O‘sha mavsumda «Chelsi» hammasi bo‘lib 103ta gol urgan, Drogbaning gollari londonliklarga «Manchester Yunayted»ni 1 ochkoga ortda qoldirib, chempion bo‘lishga yordam bergandi.
2. APLda eng ko‘p gol urgan misrlik futbolchi
Bir paytlar «Tottenhem», «Midlsbro», «Uigan», «Vest Hem» kabi jamoalar safida o‘ynagan Mido APLda jami 22 gol urgandi. Saloh bir mavsumda hamyurtining natijasidan anchagina ilgarilab ketdi.
3. APLda het-trik qilgan ilk misrlik futbolchi
Shu yilning 17 martida «Liverpul» «Uotford» ustidan 5:0 hisobida g‘alaba qozondi va Saloh bu o‘yinda pokerga erishdi. Uchinchi goldan keyin Saloh bir qator ko‘rsatkichlarni qayd etdi – Klopp boshqaruvi paytidagi «Liverpul» futbolchisining ilk het-trigi, 2013 yildan buyon «Enfild»dagi ilk het-trik va 2014 yildan buyon umuman het-trik qayd etgan ilk «Liverpul» futbolchisi.
4. Eng ko‘p marta oyning eng yaxshi futbolchisi
Muhammad Saloh – APL tarixida bir mavsumda 3 marta oyning eng yaxshisi sifatida tan olingan dastlabki futbolchi. Noyabr, fevral va mart oylarida u shunday e'tirofga sazovor bo‘ldi. Hujumchida yana ikki imkoniyat bor.
5. Bir mavsumda chap oyoqda eng ko‘p gol urgan futbolchi
30 goldan 23tasini Muhammad chap oyoqda urgan. APL tarixidagi eng yaxshi ko‘rsatkich. Bungacha Robbi Fouler ( u ham «Liverpul»da o‘ynagan) chap oyoqda 19 gol urgandi.
6. Debyut mavsumda «Liverpul»da eng ko‘p gol urgan futbolchi
Muhammad Salohning «Enfild»dagi ilk mavsumidagi 30 goli Fernando Torresning natijasini yaxshiladi. Ispaniyalik hujumchi «Liverpul»dagi ilk mavsumida 24 golga mualliflik qilgandi.
7. Krishtianu Ronaldudan keyingi, bir mavsumda barcha musobaqalarda 40dan ortiq gol urgan ilk futbolchi
«Bornmut» darvozasiga urilgan gol Salohning bu mavsumda barcha musobaqalardagi 40-goli bo‘ldi. Bu ko‘rsatkich bo‘yicha, hozircha Krishtianu Ronaldu rekordchi bo‘lib turibdi, u 2007/08 yilgi mavsumida 42 gol urgan. Ammo Saloh hali APLning keyingi 4 turida va YeChLda kamida 2 o‘yinda maydonga tushishi mumkin. U Ronalduning rekordini yangilashi kutilmoqda.
8. Bir mavsumda 40dan ortiq gol urgan uchinchi «Liverpul» futbolchisi
1961/62 yilgi mavsumda Rojyer Hant, 1983/84 va 1986/87 yilgi mavsumlarda Ian Rash bir mavsumda 40dan ortiq gol urishning uddasidan chiqishgan. Yuz yildan ortiq tarixga ega klub safida Muhammad Saloh mana shu uchlikka kirishga muvaffaq bo‘ldi.
9. Bir mavsumda YeChLda eng ko‘p gol urgan «Liverpul» futbolchisi
Bu ko‘rsatkich bo‘yicha misrlik yulduz jamoadoshi Roberto Firmino bilan teng bormoqda. Har ikki futbolchi hozircha 8 gol muallifi bo‘lishdi va bu natijani oshirish uchun kamida ikki o‘yinga egalar.
Qayd etish joizki, ikkala futbolchi ham YeChL saralashining so‘nggi bosqichida bittadan gol urishgan, lekin gollar faqat guruh bosqichdan boshlab hisobga olib boriladi.
10. Barcha musobaqalarda 50dan ortiq golda qatnashgan ilk APL futbolchisi
Bunday raqamlarnii faqat La Ligada Messi yoki Ronaldu ijrosida ko‘rardik. Saloh ushbu mavsumda 40 goldan tashqari, 11 marotaba golli pasni amalga oshirgan.
11. Muhammad Saloh – APLning 22 o‘yinini golsiz tark etmagan ilk futbolchi
O‘z vaqtida Robin van Persi va Krishtianu Ronaldu bir mavsumning 21 o‘yinida gol urishning uddasidan chiqishgandi. Salohning «Bornmut»ga qarshi o‘yini uning maydonni golsiz tark etmagan 22-o‘yini bo‘ldi.
Albatta, bu faqat bir mavsumdagi ko‘rsatkichlar. Salohning haqiqatan ham ushbu liga afsonasiga aylanib, yuqorida tilga olingan Drogba, Ronaldu, van Persi yoki Fouler darajasiga chiqishi uchun yana bir necha yil mana shunday tempda o‘ynashi kerak bo‘ladi. Bu qanday amalga oshadi yoki Suares, Koutino kabi yulduzlar kabi u ham Ispaniyaga ketib qoladimi, vaqt ko‘rsatadi. Hozircha shuni aytish mumkinki, Saloh har tomonlama, ushbu mavsumda APLning eng yaxshi o‘yinchisi bo‘lishga loyiq bo‘lib ulgurdi.
Internet materiallari asosida
