19 aprel kuni Milliy matbuot markazida O‘zbekiston mustaqil bosma ommaviy axborot vositalari (OAV) va axborot agentliklarini qo‘llab-quvvatlash va rivojlantirish jamoat fondi rahbari Said-Abdulaziz Yusupov ishtirokidagi matbuot anjumani o‘tkazildi, unda 2017 yil yakunlari bo‘yicha hisobot berildi hamda kelgusidagi rejalar bilan bo‘lishildi. Tadbirda qatnashgan KUN.UZ muxbiri shu haqida xabar berdi.
Fond rahbarining so‘zlariga ko‘ra, o‘tgan yili asosiy e'tibor quyidagi yo‘nalishlarni qo‘llab-quvvatlash va rag‘batlantirishga qaratilgan:
- mustaqil bosma OAV va axborot agentliklarining jamiyatni demokratlashtirish va yangilash;
- mamlakatni modernizatsiya va isloh qilish jarayonlarini keng yoritish;
- kuchli fuqarolik jamiyatini barpo etish;
- inson huquqlarini himoya qilish;
- jamoatchilik fikrini umumlashtirish va ifoda etish;
- fuqarolarning huquqiy va siyosiy madaniyati, ularning ijtimoiy va siyosiy faolligini oshirishda OAVning rolini kuchaytirish;
- bosma nashrlar va axborot agentliklari materiallarining professional, g‘oyaviy va badiiy darajasini oshirishga yo‘naltirilgan loyiha va dasturlarni moliyalashtirish;
- jurnalist va texnik xodimlarni tayyorlash hamda qayta tayyorlash, ularning malakasi va ijodiy faolligini oshirish.
Bularning barini amalga oshirish maqsadida hisobot davrida Fond tomonidan O‘zbekiston Respublikasi Oliy Majlisi huzuridagi Nodavlat notijorat tashkilotlari va fuqarolik jamiyatining boshqa institutlarini qo‘llab-quvvatlash jamoat fondi mablag‘larini boshqarish bo‘yicha Parlament komissiyasi tomonidan ajratilgan subsidiyalar hamda Fondning o‘z mablag‘lari hisobidan ko‘plab loyihalar amalga oshirilgan. Said-Abdulaziz Yusupovning ma'lum qilishicha, hisobot davrida 70 dan ziyod yirik tadbirlar tashkil etilgan hamda ularda 1700 dan ortiq OAV vakillari ishtirok etishgan.
