Shavkat Mirziyoyev Afg‘onistonga hamdardlik bildirdi

O‘zbekiston Respublikasi prezidenti Shavkat Mirziyoyev Kobul va Puli-Xumri shaharlarida sodir etilgan terrorchilik harakatlari oqibatida ko‘plab insonlar halok bo‘lgani munosabati bilan Afg‘oniston Islom Respublikasi prezidenti Muhammad Ashraf G‘aniga maktub yo‘llab, Afg‘oniston xalqi, marhumlarning oila a'zolari va yaqinlariga hamdardlik bildirdi. Bu haqda prezident matbuot xizmati xabar bermoqda.

Eslatib o‘tamiz, avvalroq Kobuldagi portlashda halok bo‘lganlar soni 57 kishiga yetgani xabar berilgandi. Ta'kidlanishicha, portlash tufayli yana taxminan 119 kishi jabrlangan. Hodisa 22 aprel kuni ertalab Kobuldagi saylovchilarni ro‘yxatga olish uchun markaz yonida sodir bo‘ldi. Xudkush terrorchi tomonidan ikkita portlovchi qurilma ishga tushirilgan.