Moskvada qurollangan noma'lum kimsalar muhojirlarni tunab ketdi

Moskvada qurollangan va niqoblarda bo‘lgan noma'lum kimsalar muhojirlar yotoqxonasiga kirib, u yerdagi odamlarni tunab ketgan. Bu haqda muhojirlar manfaatlarini bildiruvchi huquqshunos Valentina Chupik ma'lum qildi.

Bosqinchilik 26 aprelda mehnat muhojirlari uchun mo‘ljallangan, Paveletskaya sohilbo‘yidagi “Pamir-Alyans” yotoqxonasida yuz bergan.

“Ular taniqlik belgilari bo‘lmagan qora uniformadagi kishilar edi. Barchasi niqobda, barchasi qurollangan edi”, deb aytgan Chupik.

Bosqinchilar cho‘chib ketgan odamlarni xonalaridan chiqarib, do‘pposlab va barchalarini bir nechta xonalarga qamab qo‘yishgan. Jabrlanuvchilar xonalarga shunchalik ko‘p qamalganki, ular tik turishlariga to‘g‘ri kelgan.

Bir soatdan keyin voqea joyiga OMON xodimlari yetib kelishgan. Ular muhojirlarni ozod qilishgan. Odamlar xonalariga qaytganlarida shaxsiy narsalari va pullari yo‘qolganini aniqlashgan. Tumbochkalar va shkaflar eshiklari sindirilgan, to‘shaklar sochib tashlangan bo‘lgan.

“Markaziy osiyolik bir kishining 77 ming rubli (1,2 ming dollar), boshqasining 69 ming rubli (1,1 ming dollar) yo‘qolgan. Qolganlar kamroq jabr ko‘rishgan – ulardan 5 ming rubldan 22 ming rublgacha (80-350 dollar) pullar o‘g‘irlangan”, deb qo‘shimcha qilgan Chupik.

Ta'kidlanishicha, politsiya jinoyatchilarni qidirmoqda.

“Pamir-Alyans” tejamkor sinfdagi mehmonxona turidagi yotoqxona bo‘lib, 6, 8, 10 va 12 kishilik xonalarni taklif qiladi. Yotoqxona o‘zining arzon narxlari bilan muhojirlarni jalb qiladi. Bu yerda yashash narxi xonasiga qarab kuniga 200 rubldan (3 dollar) boshlanadi.