Madridning “Real” va Myunxenning “Bavariya” klublari Chempionlar ligasi yarimfinalining javob uchrashuvida durang natija qayd qildi. Madriddagi “Santyago Bernabeu” stadionida o‘tgan uchrashuv 2:2 hisobi bilan yakunlandi.
Myunxenda o‘tgan uchrashuv madridliklarning foydasiga hal bo‘lgandi (1:2). Shu tariqa ikki uchrashuv natijasiga ko‘ra, madridliklar musobaqaning finaliga qatorasiga 3-marta chiqishdi. Bundan avvalgi 2 mavsumda ham “Real” musobaqaning finaliga chiqib, unda g‘olib bo‘la olgandi.
Avval bunday natijaga faqatgina ikkita italyan klubi – “Yuventus” va “Milan” erisha olgan. Turinliklar musobaqaning 1996, 1997 va 1998 yillardagi, milanliklar esa 1993, 1994 va 1995 yillardagi finallarida ishtirok etishga muvaffaq bo‘lishgan. Qayd etish joizki, “Yuve” va “Milan” bu finallardan faqat biridagina g‘olib bo‘lgan (mos ravishda 1996 va 1994 yillarda).
