O‘zbekiston Respublikasi ichki ishlar vazirining buyrug‘i bilan O‘zbekiston Respublikasida siyosiy boshpana berish to‘g‘risidagi iltimosnoma shakli tasdiqlandi.
Yangi iltimosnoma shaklida O‘zbekiston Respublikasida siyosiy boshpana taqdim etilishi uchun o‘zining fuqaroligi bo‘yicha mansub davlatda yoki doimiy yashash joyida ijtimoiy-siyosiy faoliyat, diniy e'tiqodi, o‘zining fuqaroligi bo‘yicha mansub davlatda yoki doimiy yashash joyida irqiy yoki milliy mansubligi uchun ta'qib qilinayotgan yoki ta'qib qilishning jabrlanuvchisi bo‘lishiga real tahdidning mavjudligi, o‘zining fuqaroligi bo‘yicha mansub davlatda yoki doimiy yashash joyida xalqaro huquq normalarida nazarda tutilgan inson huquqlari buzilishining boshqa holatlari yuzasidan ma'lumot taqdim etish lozim.
Shuningdek, siyosiy boshpana so‘ragan shaxs o‘zining tug‘ilgan kuni, oyi, yili va joyi, fuqaroligi, millati, pasport ma'lumotlari, O‘zbekiston Respublikasida o‘zi bilan birga kim yashashi haqida ma'lumot berishi kerak.
