Siyosiy boshpana so‘rash to‘g‘risidagi iltimosnoma qay tartibda yoziladi?

O‘zbekiston Respublikasi Prezidentining 2017 yil 29 may sanasida «O‘zbekiston Respublikasida siyosiy boshpana berish to‘g‘risidagi» PF-5060 sonli farmoni tasdiqlangandi. Mazkur farmon asosida joriy yilning 14 aprelida Ichki ishlar vazirining 106-sonli buyrug‘i chiqdi. Bu buyruq 12 may kuni O‘zbekiston Respublikasi Adliya vazirligida davlat ro‘yxatidan o‘tkazildi.

Buyruq asosida siyosiy boshpana so‘rash to‘g‘risidagi iltimosnoma shakli tasdiqlandi. Iltimosnoma faqatgina O‘zbekiston Respublikasi Prezidenti nomiga yoziladi.

Iltimosnomada siyosiy boshpana so‘rayotgan shaxs doimiy yashaydigan mamlakatida ijtimoiy-siyosiy faoliyati, diniy e'tiqodi haqidagi ma'lumotlarni bayon qiladi, mamlakatida unga nisbatan irqiy yoki milliy mansubligi uchun ta'qib qilinayotganining real tahdidi mavjudligini ko‘rsatadi.

Siyosiy boshpana so‘rayotgan shaxsdan xalqaro huquqning inson huquqlariga oid qaysi normalari buzilayotganini asoslab berish talab etiladi. Shuningdek, iltimosnomada o‘zi va oila a'zolari to‘g‘risida to‘liq ma'lumotlarni berishi kerakligi ham ko‘rsatib o‘tilgan.