Bosh prokuratura 1 mln dollarni to‘lamayotgan tadbirkorga nisbatan jinoiy ish ochdi

O‘zbekiston Respublikasi Bosh prokuraturasi hindistonlik tadbirkor Prem Nazir murojaati bo‘yicha jinoiy ish ochdi. Bu haqda Prem Nazirning Facebook sahifasida ma'lum qilingan.

Unda yozilishicha, Bosh prokuratura toshkentlik tadbirkor, «Tibbiyot Dunyosi» firmasi rahbari A.B.ga nisbatan jinoiy ish qo‘zg‘atilgan. U yirik miqdorda firibgarlik qilganlikda gumon qilinmoqda. Jinoiy ish ochilishiga hindistonlik tadbirkor Prem Nazir asos solgan va Singapurda ro‘yxatdan o‘tgan «Profil Trading Pte.Ltd» kompaniyasi bilan imzolangan shartnoma bajarilmaganiga doir vajlar asos bo‘lgan. 

Nazirning sahifasida ta'kidlashicha, uning kompaniyasi 2015 yili Bo‘riyevning firmasi orqali O‘zbekistonga 1 097 580 AQSh dollariga teng vaksina yetkaziib bergan. Shundan buyon, tadbirkor o‘zbekistonlik hamkoridan pulni ololmagan. O‘zbekistonlik tadbirkor esa, vaksinalar insonparvarlik yordami sifatida keltirilganini da'vo qila boshlagan. 

Prem Nazirning uqdirishicha, uning «Tibbiyot Dunyosi» bilan hamkorlik qilishida firma 105 ming dollarlik shartnoma shartini sidqidildan bajargani muhim rol o‘ynagan. Nazir shundan so‘ng, yirik miqdordagi shartnomani xavotirlanmay imzolagan. Biroq keyingi jarayonlar chuv tushirilganini anglata boshlagan.

Ta'kidlash o‘rinliki, KUN.UZ Prem Nazir murojaatini o‘rganish jarayonida edi. Eslatib o‘tamiz, Nazir rahbarlik qilayotgan «Profil Trading Pte.Ltd» firmasi O‘zbekistonda yirik farmatsevtika korxonalaridan birini barpo etishni rejalashtirayotgan edi.