Jahon banki O‘zbekistonda majburiy mehnatni tugatish bo‘yicha ko‘mak beradi

Jahon banki guruhi O‘zbekistonda millionlab kishi faoliyat olib borayotgan qishloq xo‘jaligi sohasini diversifikatsiyalash va sektorni zamonaviylashtirishga ko‘mak berishini ma'lum qildi. Bu haqda O‘zbekiston Respublikasi Prezidenti Shavkat Mirziyoyev bilan rasmiy uchrashuv chog‘ida ma'lum qilingan. 

Xabar qilinishicha, hamkorlikdan maqsad - qishloq xo‘jaligi sohasida transformatsiyani amalga oshirib, ayni ulkan sektorda, jumladan xalqning moddiy ahvolini yaxshilashga yordam beruvchi paxta yetishtirish yo‘nalishida majburiy mehnatga batamom barham berishdan iborat. 

"O‘zbekiston to‘g‘ri yo‘ldan bormoqda. Dadil boshlangan iqtisodiy va ijtimoiy islohotlar, tadbirkorlikka ochib berilayotgan yo‘l va davlat tashkilotlarining faoliyatini muvofiqlashtirish xususiy sektordagi sarmoyalarni mamlakatga jalb etishi tayin. Bu bilan yangi ishchi o‘rinlari yaratiladi, davlat Markaziy Osiyo va jahonda ilg‘or iqtisodiyotga ega davlatlardan biriga aylanishiga shubha qilmayman", deydi Jahon banki prezidenti Kim. 

Shuningdek, Jahon banki bilan 4ta yangi loyiha: energosamaradorlikni oshirish, sabzavot yetishtirish, tez tibbiy yordam xizmati kabi yo‘nalishlarda umumiy qiymati 940 million dollarga teng shartnomalar imzolandi. Shunday qilib, Jahon bankining O‘zbekistondagi portfeli 2,8 milliard dollarga tenglashadi.