Islom dunyosi Al-Quds bo‘yicha imtihondan o‘ta olmadi – Erdo‘g‘an 

Islom dunyosi Al-Quds bo‘yicha imtihondan o‘ta olmadi, deb aytdi Turkiya prezidenti Rajab Toyyib Erdo‘g‘an. Uning fikricha, musulmon davlatlari AQShning Isroildagi elchixonasining Al-Qudsga ko‘chirilishiga yetarlicha keskin munosabat bildirishmagan.     

“Al-Quds bu shunchaki shahar emas. Bu musulmonlar uchun ramz, imtihon. Islom dunyosi bu imtihonni topshira olmadi. Butun dunyo ham uni topshira olmadi. BMT AQSh sodir etgan bu qadamga samarali qarshi turolmadi. Biz, musulmonlar, qoralashdan boshqa hech qanday chora ko‘rmayapmiz”, deb aytgan Erdo‘g‘an Isroilning G‘azo sektoridagi harakatlariga qarshi Istanbulda o‘tgan ko‘p ming kishilik namoyishda. 

Erdo‘g‘anning aytishicha, “agar musulmonlar birdam bo‘lib, zulmga qarshi birga tursalar, unda Isroilning aqlsizligi uzoq davom etmaydi”. 

Namoyishda ishtirok etgan Turkiya bosh vaziri Binali Yildirimning aytishicha, “falastin xalqining adolatli kurashi Turkiyaning ham kurashidir”. U Isroil yetakchilarini Germaniya va Italiya fashistlari yetakchilariga tenglashtirgan. “Isroil hukumati, Gitler va Mussoliniga taqlid qilib, butun dunyoga o‘zining asl mohiyatini ko‘rsatmoqda – ular bosqinchilardir va huquq me'yorlariga amal qilmaydi”, deb aytgan Yildirim.

AQSh elchixonasining Al-Qudsga ko‘chirilishi munosabati bilan G‘azo sektorida norozilik namoyishlari yangi kuch bilan boshlandi. Isroil askarlarining namoyishchilarni o‘qqa tutishi oqibatida 60 dan ko‘proq falastinlik halok bo‘lgan.