Turizmni rivojlantirish qo‘mitasi raisiga ikki nafar o‘rinbosar tayinlandi

O‘zbekiston Respublikasi Turizmni rivojlantirish davlat qo‘mitasi rahbariyatida yangi lavozim tayinlovlari ro‘y berdi. Bu haqda Kun.uz’ning hukumatdagi manbasi xabar qildi.

Qayd etilishicha, Faxriddin Umarovich Davrukov Turizmni rivojlantirish davlat qo‘mitasi raisining o‘rinbosari lavozimini egalladi.

Faxriddin Davrukov 2008 yildan Vazirlar Mahkamasida makroiqtisodiy va tuzilmaviy islohotlar, xorijiy investitsiyalarni jalb qilish, ma'lumot to‘plash va mintaqlar rivojiga doir masalalarni tahlil qilish yo‘nalishlarida ishlagan. 

2015 yildan u "O‘zpaxtasanoateksport" xolding kompaniyasida soha rivoji strategik prognozlash boshqarmasi boshlig‘i lavozimida faoliyat yuritgan. 

Shuningdek, Abdulaziz O‘rolboyevich Aqqulov ham Turizmni rivojlantirish davlat qo‘mitasi raisining o‘rinbosari lavozimiga tayinlandi.

Aqqulov 2017 yilning yanvaridan qo‘mitaning Turizm sanoatini muvofiqlashtirish va rivojlantirish boshqarmasi boshlig‘i bo‘lib ishlagan.

O‘zbekiston prezidenti Shavkat Mirziyoyev bu haqdagi tegishli qarorlarni 2018 yil 22 may kuni imzolagan.

Eslatib o‘tamiz, avvalroq O‘zbekiston TIVda yangi lavozim tayinlovi ro‘y bergandi.