Kim Chen In Tramp bilan uchrashishga rozi

Shimoliy Koreya rahbari Kim Chen In Janubiy Koreya prezidenti Mun Je In bilan muloqot chog‘ida AQSh prezidenti Donald Tramp bilan uchrashish istagi borligi haqida ma'lum qilgan. Bu haqda «Yonhap» agentligi xabar tarqatdi.

Agentlik ma'lumotiga ko‘ra, Kim Chen Inning Tramp bilan uchrashuv o‘tkazish istagi «juda qat'iy».

Bundan avvalroq Shimoliy va Janubiy Koreya yetakchilari 26 may kuni yashirin ravishda Pxanmunjomdagi chegara punktida uchrashishgani ma'lum qilingandi. Bu uchrashuv ikki davlat yetakchilarining keyingi bir oy ichidagi ikkinchi uchrashuvi bo‘ldi, bundan oldin, 27 aprel kuni ham rasmiy uchrashuv o‘tkazishgandi.

Ular Donald Tramp bilan uchrashuv bekor qilinganini muhokama qilishgan. Siyosatchilar 1 iyun kuni rasmiy muzokaralar o‘tkazishga kelishib olishgan.

Bu vaqtda Donald Trampning matbuot kotibi Sara Sanders Amerika ma'muriyati jamoasi AQSh va KXDR yetakchilarining uchrashuv maydonini tayyorlash uchun Singapurga yo‘l olishi haqida ma'lumot bergan.