Sebastyan Fettel “Formula-1”ning Kanada Gran-prisi g‘olibi bo‘ldi

Foto: Getty Images

“Formula-1”ning “Ferrari” jamoasi a'zosi Sebastyan Fettel Kanadada o‘tgan bosqichda g‘olib bo‘ldi.

Marra chizig‘ini ikkinchi bo‘lib “Mersedes” vakili Valtteri Bottas, uchinchi bo‘lib “Red Bull” a'zosi Maks Ferstappen kesib o‘tdi. Amaldagi jahon chempioni va ushbu mavsum yetakchisi Lyuis Xemilton 5-o‘rin bilan kifoyalanib qoldi.

Fettel “Formula-1” poygasining 4 karra chempioni hisoblanadi. Shuningdek, nemis “Formula-1”dagi elliginchi Gran-prida g‘alaba qildi, Kanada Gran-prisida esa ikkinchi bor zafar quchdi.

Ushbu g‘alaba evaziga Fettel umumiy jadvalda Xemiltondan 1 ochko oldinga chiqib oldi: nemis poygachisi 121 ochko, britaniyalik esa 120 ochko to‘pladi. 3-o‘rinni 86 ochko bilan Valtteri Bottas egallamoqda.

Poyganing keyingi bosqichi Fransiyada 22-24 iyun kunlari bo‘lib o‘tadi.

#Kanada #Formula-1 #Sebastyan Fettel