G‘alla mavsumi: Paxtachida korxonaning yuk mashinalarini YHX bo‘limi boshlig‘i shaxsan o‘zi «qamadi»

Biz bilan suhbatda tuman YHXB boshlig‘i, mayor Z.Turdiyev g‘allaga jalb etish uchun emas, mashinalarni hujjati yo‘qligi uchun jarima maydonchasiga olib kelib qo‘yilganini ta'kidladi. A.Berdiyev e'tiroz qilganida, unga aytgan gaplarini tan olmadi.

Biroq, mana, bugun 14 iyun, voqeaga 9 kun bo‘libdiki, mashinalar jarima maydonchasidan chiqarilgani yo‘q.

A.Berdiyevning aytishicha, tuman YHXB boshlig‘i guvoh oldida unga «avtomashinalarni jarima maydonchasiga qamashni Samarqand viloyat ichki ishlar boshqarmasi boshlig‘i Aziz Toshpo‘latov unga shaxsan topshiriq qilib berganini, faqat u kishining ruxsati bilangina mashinalar jarima maydonchasidan ozod etilishi»ni bildirgan.

Biz «Dorkomplektsnab Plus» MChJ hududida shag‘al tashuvchi shaxsiy avtomashinalar haydovchilari bilan ham gaplashdik, ular ham hamma hujjatlari bo‘lishiga qaramasdan, ularning ham mashinasini jarima maydoniga kiritib qo‘yilganini va mashinalari g‘alla tashishga yaroqsiz bo‘lgani uchungina ertasi kuni ularga javob berib yuborilganini aytishdi. Xususiy yuk avtomashinalari haydovchilari mashinalari aynan g‘alla tashish uchun safarbar etilganini aytishmoqda, chunki ularning qo‘liga tilxat va shartnoma ham berilgan.

Shag‘al tashuvchi «Kamaz» rusumli bunday yuk mashinalari g‘alla tashishga ixtisoslashmagan: ularning borti ochiq, korxonaga tegishli avtomashinalar yirik hajmdagi granit bo‘laklarini tashigani sababli borti pachoq bo‘lib, teshilmasligi uchun qo‘shimcha metall plastinalar bilan zirhlangan.

— Tushunamiz, g‘allani nes-nobud qilmasdan yig‘ishtirib olish kerak. Lekin menga YHXB boshlig‘imi, tuman hokimligidan biror mutasaddi mashinadan yordam qil, deganida albatta, yo‘q demas edik. Homiylik va yordamdan hech qachon qochmaganman. Bizning mashinalarda g‘alla tashib bo‘lmasa, ular dalaga botib qoladi. Men g‘alla tashish mumkin bo‘lgan boshqa xususiy mashinalarni, albatta, o‘z hisobimdan yollab berar edim. G‘alla kampaniyasi bahona bizning korxonaning ishiga xalaqit berish maqsad qilingani ko‘rinib turibdi, — deydi A.Berdiyev.

Ayni paytda korxonada ish to‘xtab qolgan. Chunki sutkasiga 1600 metr kub shag‘al ishlab chiqaruvchi korxona stabil ishlab turishi uchun 4 ta yuk mashinasi to‘xtovsiz granit toshlari tashib turishi kerak.

— Hozir yana 2 ta mashinamiz bor, lekin ular korxonamiz uskunalari ehtiyojini qondira olmaydi. Elektr energiyasi, suv behudaga sarf bo‘ladi. Shu sababli uskunalarni to‘xtatishga majbur bo‘ldik.

Albatta, g‘alla rizq-ro‘zimiz, uni uvol qilmasdan o‘z vaqtida yetishtirib olish har birimizning burchimiz. Mayli, mashinalar o‘z korxonasi hududida hujjatsiz harakat qilibdi, jazolanishi ham kerakdir. Lekin ishni ataylabdan paysalga solish, yordamdan qochmaydigan tadbirkorning ishini qasddan to‘xtatib qo‘yishga majburlash, 150 ga yaqin ishchining maoshi kamayishiga sabab bo‘lish qaysi qolipga sig‘adi?

Tuman YHX bo‘limi boshlig‘i o‘zi bosh bo‘lib mashinalarni arzimas vaj bilan qamab, ularni jarima maydonchasidan tezroq ozod qilinishini istamayotganini nima bilan tushunish mumkin?!

Gap shundaki, «Dorkomplektsnab Plus» MChJ ishlatayotgan avtomashinalar boshqa bir korxonadan ijaraga olingan. «Dorkomplektsnab Plus» MChJ va «Granit» AJ o‘rtasida mazkur avtotransport vositalaridan foydalanishga oid ijara shartnomasi taqdim etilganiga qaramay Z.Turdiyev mashinalarni «Dorkomplektsnab Plus» MChJga emas, mashinalarning asl egasi bo‘lgan «Granit» aksiyadorlik jamiyatiga berishi haqida asossiz talab qo‘ymoqda. Lekin «Granit» AJ direktori ham 3 marta kelib so‘raganda mashinalar berilmagan.

O‘sha-o‘sha vaj — Samarqand viloyat ichki ishlar boshqarmasi boshlig‘i A.Toshpo‘latovning mashinalarni chiqarmaslik haqidagi og‘zaki ko‘rsatmasini asos qilib keltirmoqda Z.Turdiyev.

Jarima maydonchasi darvozasidan yuk mashinasining bittasi ko‘rinib turardi. «Ikkinchisi ham shu yerdami, kirib ko‘raylik», deganimizda Z.Turdiyev ko‘rishga, suratga olishga izn bermadi.

Prezidentimiz ishchi o‘rin yaratib, samarali mehnat qilayotgan tadbirkorlarni boshimga ko‘taraman deb turganda, quyi pog‘ona rahbarlari prezident belgilayotgan siyosatga qarshi chiqib, tadbirkorlarni norozi qilayotganini qanday izohlash mumkin. Shu emasmi, siyosatga xiyonat?

Umid qilamizki, viloyat hokimi T.Jo‘rayev sektorida sodir bo‘lgan mazkur holat chuqur o‘rganib chiqiladi va sansalorlikka yo‘l qo‘ygan shaxslar tegishli jazosini oladi.

Shuhrat Shokirjonov,
Kun.uz muxbiri