Yangi qaror: Yozuvchilar uyushmasi faoliyati yanada takomillashtiriladi

O‘zbekiston Respublikasi Vazirlar Mahkamasining “O‘zbekiston Yozuvchilar uyushmasi faoliyatini yanada takomillashtirish va uning moddiy-texnika bazasini mustahkamlashning qo‘shimcha chora-tadbirlari to‘g‘risida”gi qarori qabul qilindi.

Hujjat bilan homiy tashkilotlarning Qoraqalpog‘iston Yozuvchilar uyushmasi hamda O‘zbekiston Yozuvchilar uyushmasining viloyatlardagi bo‘limlari faoliyatini qo‘llab-quvvatlash maqsadida ularga bir marta 500,0 mln. so‘mdan homiylik xayriyalarini ajratish va keyinchalik doimiy homiylik xayriya yordamini ko‘rsatish to‘g‘risidagi takliflari ma'qullandi.

Homiy tashkilotlar va Qoraqalpog‘iston Yozuvchilar uyushmasi hamda O‘zbekiston Yozuvchilar uyushmasining viloyatlardagi bo‘limlariga ular o‘rtasidagi o‘zaro hamkorlikni samarali yo‘lga qo‘yish maqsadida quyidagilarni nazarda tutuvchi “Do‘stlar klublari”ni tashkil etish tavsiya qilindi:

homiy tashkilotlar va Qoraqalpog‘iston Yozuvchilar uyushmasi hamda O‘zbekiston Yozuvchilar uyushmasining viloyatlardagi bo‘limlari o‘rtasidagi o‘zaro hamkorlik dasturlarini ishlab chiqish va ularning samarali bajarilishini tashkil etish;

homiylik xayriyalaridan maqsadli foydalanishni muvofiqlashtirish, Qoraqalpog‘iston Yozuvchilar uyushmasi hamda O‘zbekiston Yozuvchilar uyushmasining viloyatlardagi bo‘limlari va homiy tashkilotlar tomonidan amalga oshiriladigan chora-tadbirlarni “Do‘stlar klublari”ning yig‘ilishlarida muhokama qilish va istiqbolli vazifalarni hamkorlikda belgilash;

Qoraqalpog‘iston Yozuvchilar uyushmasi hamda O‘zbekiston Yozuvchilar uyushmasining viloyatlardagi bo‘limlari tomonidan ijodkorlar va homiy tashkilotlarning xodimlari o‘rtasida ijodiy uchrashuvlar, turli madaniy- ma'rifiy tadbirlar, ijodkorlarning badiiy asarlari orqali homiy tashkilotlar faoliyati targ‘ibotini tashkil qilish.

Belgilab qo‘yilishicha: 

Qoraqalpog‘iston Yozuvchilar uyushmasi hamda O‘zbekiston Yozuvchilar uyushmasining viloyatlardagi bo‘limlari faoliyati O‘zbekiston Yozuvchilar uyushmasi huzuridagi “Ijod” jamoat fondi mablag‘lari hisobidan moliyalashtiriladi. Bunda Qoraqalpog‘iston Yozuvchilar uyushmasi hamda O‘zbekiston Yozuvchilar uyushmasining viloyatlardagi bo‘limlariga ajratiladigan homiylik xayriyalari “Ijod” fondi tomonidan ajratilayotgan maqsadli mablag‘lar o‘rniga sarflanishiga yo‘l qo‘yilmaydi;

Qoraqalpog‘iston Yozuvchilar uyushmasi hamda O‘zbekiston Yozuvchilar uyushmasining viloyatlardagi bo‘limlari rahbarlari homiylik xayriyalaridan tushadigan mablag‘lar maqsadli sarflanishiga shaxsan javobgardirlar.

“Ijod” fondining hududiy bo‘limlarini moliyalashtirish manbalari etib quyidagilar belgilandi:

“Ijod” fondining hududiy bo‘limlarini saqlash bilan bog‘liq xarajatlarni moliyalashtirish qismida - “Ijod” fondining mablag‘lari;

tadbirlarni moliyalashtirish qismida - Qoraqalpog‘iston Respublikasi respublika byudjyetining va viloyatlar viloyat byudjyetlarining zaxira jamg‘armalari, Qoraqalpog‘iston Respublikasi va viloyatlar mahalliy byudjyetlar ijrosi davomida shakllangan qo‘shimcha manbalari, homiylik xayriyalari va qonunchilikda taqiqlanmagan boshqa manbalar.

Belgilanishicha, “Ijod” fondining hududiy bo‘limlari mablag‘lari tijorat banklardagi hisob raqamlarda jamlanadi va Vasiylik kengashlarining qarorlariga asosan quyidagi tadbirlarga yo‘naltiriladi:

adabiyotimiz rivojiga munosib hissa qo‘shgan keksa avlodga mansub O‘zbekiston Yozuvchilar uyushmasi a'zolariga aniq yo‘naltirilgan moddiy yordam ko‘rsatish;

ijodiy ko‘rik-tanlovlarni tashkil etish, iqtidorli yosh adiblarning Qoraqalpog‘iston Yozuvchilar uyushmasi hamda O‘zbekiston Yozuvchilar uyushmasining viloyatlardagi bo‘limlari tomonidan tavsiya etiladigan ijod namunalarini, jumladan, birinchi kitoblarini nashr etish uchun moliyaviy yordam ko‘rsatish;

xalqimizning qadimiy tarixi, boy madaniyati, asriy an'ana va qadriyatlari tarannum etilgan, milliy ma'naviyatimizning mazmun-mohiyati teran badiiy ifodasini topgan mumtoz va zamonaviy adabiyotimiz munosib namunalarining xorijiy tillarga tarjima qilinishini hamda Internet jahon axborot tarmog‘ida keng targ‘ib etilishini moliyalashtirish;

Qoraqalpog‘iston Yozuvchilar uyushmasi hamda O‘zbekiston Yozuvchilar uyushmasining viloyatlardagi bo‘limlarining moddiy-texnika bazasini mustahkamlash;

o‘z hududida yashayotgan O‘zbekiston Yozuvchilar uyushmasi a'zolari hamda iste'dodli va istiqbolli yosh ijodkorlarni har tomonlama qo‘llab-quvvatlash, atoqli ijodkorlarga bag‘ishlangan ekspozitsiyalar uyushtirish;

ijtimoiy va ijodiy faol, keng kitobxonlarning ishonchini qozongan adiblarning ijodiy kechalarini tashkil etish va o‘tkazish.

O‘zbekiston Respublikasi Moliya vazirligi O‘zbekiston Yozuvchilar uyushmasi muassisligida nashr etiladigan “O‘zbekiston adabiyoti va san'ati” gazetasi, “Sharq yulduzi” - “Zvezda Vostoka”, “Jahon adabiyoti”, “Yoshlik”, “Amudaryo” jurnallari tahririyatlarining xarajatlarini (qog‘oz bilan ta'minlash, bosmaxona xarajatlarini qoplash va boshqa xarajatlarni hisobga olgan holda), o‘z daromadlari bilan qoplanmagan qismiga O‘zbekiston Respublikasi respublika byudjyetining 2018 yil parametrlari doirasida “Ijod” fondiga 500,0 mln. so‘m mablag‘ ajratadi.