«Nohaqlik, adolatsizlik, tabaqalashtirish». Deputat «tonirovka»ga belgilangan narxga munosabat bildirdi

O‘zbekiston Respublikasi Oliy Majlisining Quyi palata deputati Eldor Tulyakov tusi o‘zgartirilgan (qoraytirilgan) oynali yengil avtotransport vositalaridan foydalanishni tartibga solish chora-tadbirlari to‘g‘risidagi hukumat qarorini tanqid qilib, ijtimoiy tarmoqdagi rasmiy sahifasida izoh qoldirgan.

«Nohaqlik, adolatsizlik, tabaqalashtirish....diskriminatsiya... Umid qilamizki xalqning asosli e'tirozlaridan keyin nega aynan bunday narxlar belgilanganligi borasida aniq va asosli tushuntirishlar beriladi. Konstitutsiyaviy sudning xam munosabatini kutib qolamiz», deb yozadi u.

Avvalroq ham deputat bu masalaga e'tibor qaratgandi.

«Mazkur masalaga biz maqtanchoqlik, manmanlik omili sifatida emas, balki tabiiy iqlim sharoitimizdan kelib chiqib, sog‘lig‘imizni asrab-avaylash uchun ko‘riladigan chora sifatida qarashimiz lozim», deya Ichki ishlar vazirligi tomonidan taklif etilgan loyihaga munosabat bildirgandi Eldor Tulyakov.

Uning fikricha, avtomashina oynalarini qoraytirib, maqtanib yuradiganlar ham topiladi, lekin bunaqalar ko‘pchilik emas.

«Shunday ekan, pullik bo‘lsa ham, kun mobaynida asosiy vaqtini mashinada o‘tkazadigan taksi haydovchilari uchun ham avtomashina oynalarini qoraytirish imkoniyati yaratilishi lozim», degandi u. Biroq, deputat «pullik bo‘lsa ham» jumlasi bilan bunchalar katta narxni nazarda tutmagani keyingi munosabatidan ma'lum bo‘lmoqda.