Saudiya Arabistoni Qizil dengiz orqali neft tashuvini to‘xtatdi

Dunyodagi eng katta neft eksportyori hisoblangan Saudiya Arabistoni 26 iyul kuni  neft tashuvini Qizil dengizdagi Bob al-Mandib orqali amalga oshirmay turishini ma'lum qildi. Bu haqda mamlakat Energetika vaziri Xolid al-Falih ma'lumot tarqatgan. 

 «Saudiya Arabistoni Bob al-Mandib orqali o‘tuvchi barcha neft tashuvini noma'lum muddatgacha bekor qiladi. Bob al-Mandibdagi vaziyat aniqlashtirib, hudud xavfsiz bo‘lishini kutamiz», deyiladi vazirning bayonotida. 

Yamandagi husiylar harakati a'zolari hujum qilgan, deb ko‘rilayotgan ikkita neft tashuvchi katta tankerlar aynan Saudiya Arabistonga tegishli edi. 

Ayni paytda Yamanda Saudiya qirolligi oilasi tomonidan qo‘llab-quvvatlanayotgan koalitsiya asosan shialardan tashkil topgan husiylar guruhi bilan uch yildan buyon kurashib kelmoqda. 

Suvaysh kanali orqali Yevropaga yetkazib beriladigan neft fuqarolar urushi girdobida qolgan Yamanning qirg‘oqlaridan olib o‘tiladi. Saudiya Arabistoni ushbu vaziyatda mintaqaviy raqibi Eronni ayblaydi. Biroq, bu doim inkor etib kelingan.  ​