Janubiy Koreya hukumati 12 mamlakat, jumladan, O‘zbekiston fuqarolari uchun Chejudo oroli hududiga vizasiz kirishni taqiqladi. Bu haqda Qirg‘izistonning Koreyadagi elchixonasi rasmiy sayti xabar bermoqda.
«Koreya Respublikasi Immigratsiya xizmati ma'lumotlariga ko‘ra, 2018 yil 1 avgustdan boshlab Chejudo orolining hududiga Qirg‘iziston, Misr, Gambiya, Senegal, Bangladesh, Pokiston, Somali, O‘zbekiston, Nepal, Kamerun, Shri-Lanka va Myanma fuqarolarining vizasiz kirishiga taqiq joriy etildi», - deyiladi xabarda. O‘zbekiston elchixonasining saytida bu haqda ma'lumot yo‘q.
Chejudoga vizasiz kirish 2001 yilda qabul qilingan maxsus qonun doirasida amalga oshiriladi. Chejudo oroliga 30 kun muddatga tashrif buyurish uchun viza talab etilmaydi, bunda chet ellik sayyoh orolga faqat sayyohlik maqsadida va to‘g‘ridan-to‘g‘ri dengiz reysi yoki to‘g‘ridan-to‘g‘ri aviaparvoz orqali kelishi talab etiladi.
