Hafta o‘yinlari. «Real»ning Kataloniyaga safari, Bundesligada birinchi tur va Angliyada London derbisi
|15:49 / 24.08.201820 00914 min
Kuni kecha, yevrokuboklardagi guruh bosqichida qatnashadigan jamoalarni aniqlash uchun navbatdagi uchrashuvlar bo‘lib o‘tgan bo‘lsa, bugundan Yevropa maydonlarida milliy chempionatlarning navbatdagi tur o‘yinlari boshlanadi. E'tiborga molik uchrashuvlar haqida qo‘yida o‘qib olishingiz mumkin.
BAVARIYa - HOFFeNHAYM (24 avgust, 23:30)
Nihoyat, kuchli beshlikda so‘nggi bo‘lib, Germaniya Bundesligasi ham start olmoqda. Navbatdagi mavsumni chempion jamoa ochib beradi. So‘nggi olti mavsumda tengsiz deb topilgan «Bavariya» endi yangi murabbiy Niko Kovach qo‘l ostida yettinchi urinishni boshlaydi. Raqib esa, anoyi emas, so‘nggi mavsumlarda an'anaviy ravishda yuqori o‘rinlar uchun da'vogarlik qilib kelayotgan «Hoffenhaym».
Yulian Nagelsman jamoasi yozda eng yaxshi transfer kampaniyasini o‘tkazdi, ya'ni o‘z tarkibini deyarli saqlab qolishga erishdi. «Hoffenhaym» kabi jamoalar uchun bu ham juda muvaffaqiyatli yoz hisoblanadi. Ya'ni, tarkibdagi muhim futbolchilarni va bog‘lamlarni saqlab qolgan holda yangi mavsumga kirib kelishning o‘ziyoq, jamoaning o‘tgan yilgidan kuchliroq bo‘lishini anglatadi. «Hoffenhaym» ayniqsa, mavsumoldi yig‘inlarini ko‘tarinki ruhda o‘tkazdi - yetti o‘yinda besh g‘alaba va ikki durang. Beshala g‘alaba ham yirik hisobda qo‘lga kiritildi. Ayniqsa, «Herenven» ustidan 8:2 hisobidagi ajoyib g‘alaba, «Kevo» darvozasiga javobsiz besh gol, Germaniya kubogi dastlabki bosqichida safarda «Kayzerlautern»ni 6:1 hisobida yengish. Raqiblar u qadar kuchli emasdir, ammo hujumdagi sermahsul o‘yin jamoada o‘yinida muammo yo‘qligini ko‘rsatadi.
O‘tgan mavsumni «Rapid» safida o‘tkazgan Joalintonga alohida e'tibor qaratish mumkin. Ushbu futbolchi kubok o‘yinida het-trik muallifi bo‘ldi. Mehmonlarning asosiy o‘yinchilari Kramarich, Xyubner, Demirbay, Amiri, Rupp kabi futbolchilar jarohat tufayli safdan chiqib turgan paytda, aynan braziliyalik 22 yoshli hujumchi «Bavariya» darvozasiga xavf solishi mumkin.
«Bavariya» ham kubok o‘yinida keyingi bosqichga o‘tdi, kamtargina «Droxtersen» ustidan kamtar g‘alabaga erishdi. «Bavariya»ni Arturo Vidal tark etgan, futbolchilardan faqat David Alaba, Hames Rodriges, hamda Serj Gnabrining maydonga tushishi so‘roq ostida.
«Hoffenhaym» «Bavariya» uchun u qadar noqulay raqib hisoblanmaydi, so‘nggi 17 o‘yinda atigi ikki marotaba g‘alaba qozongan xolos. Shunday bo‘lsa-da, aynan Myunxendagi so‘nggi besh o‘yinning ikkitasida jamoa ochko olib ketganini e'tirof etish kerak.
Mavzuga oid
ARSeNAL - VeST HEM (25 avgust, 19:00)
London derbisi. Qiziq tarafi, mavsumni yangi murabbiy bilan boshlagan har ikki jamoa dastlabki ikki turda mag‘lubiyat alamini totishdi. Demak, bu o‘yindagi mag‘lubiyat Emerini ham, Pellegrinini ham iste'foga yaqinlashtirishi mumkin.
«Arsenal»ni tushunsa bo‘ladi, ikki turda «Manchester Siti» va «Chelsi» bilan o‘ynashdi, balki bu o‘yinda jamoa ochko to‘plashni boshlar. Ammo «Vest Hem»ning o‘z maydonida «Bornmut»dan mag‘lubiyati juda og‘riqli bo‘ldi. Zero, londonliklar yozda eng faol transfer kampaniyasini o‘tkazgan klublardan biri edi. Andrey Yarmolenko, Filipe Anderson kabi futbolchilar masalan, yaqin yaqinlarda ham top-jamoalarning e'tiboridagi futbolchilardan edi. Shuningdek, «Vest Hem» tarkibida Lukash Fabiyanski, Jyek Uilshir, Lukas Peres kabi futbolchilar sobiq jamoalariga qarshi maydonga tushishlari o‘yin intrigasini yanada oshiradi.
Esingizda bo‘lsa, 2015 yilning avgustida «Vest Hem» safarda «Arsenal» ustidan 2:0 hisobida g‘alaba qozongandi. Bu g‘alaba g‘arbliklar uchun hozircha oxirgi, so‘nggi 15 o‘yinda esa, yagona bo‘lib turibdi. Ammo Pellegrini jamoasi bu o‘yinda ochko olishga urinishi shart, sababi, keyingi turlarda «Everton», «Manchester Yunayted», «Chelsi»ga qarshi maydonga tushadigan jamoa turnir jadvalining yanada tubiga tushib ketishi mumkin. Angliyada odatda bunday hollarda taqvimning noqulay kelgani haqida o‘ylab o‘tirishmaydi...
YuVeNTUS - LATsIO (25 avgust, 21:00)
O‘tgan mavsumda turinliklar uchun eng noqulay raqib hisoblangan jamoa aynan «Latsio» edi. Rimliklar dastlab Turinda o‘tgan chempionat o‘yinida 2:1 hisobida g‘alaba qozonishgan, undan oldin esa, avgustda Superkubok uchun o‘yinda ustun kelgandi. Ammo mart oyida Rimda bo‘lib o‘tgan o‘yinda «Yuventus» so‘nggi daqiqalarda Dibala tomonidan urilgan gol evaziga uch ochko olib ketgandi. Demak so‘nggi yillarda bu jamoalarning o‘zaro o‘yinlari juda qizg‘in kurashlarda kechmoqda.
«Latsio» birinchi turda o‘z maydonida «Napoli»dan yengildi, «Yuventus» esa, Veronada juda og‘ir o‘yinning so‘nggi daqiqalarida 3:2 hisobida g‘alabani ilib ketdi. O‘sha o‘yinda raqib darvozasini ishg‘ol qila olmagan Krishtianu Ronalduning debyuti ham aynan shu o‘yinda ro‘y berdi. Turin Ronalduni qanday kutib olishini ko‘ramiz. Balki Ronaldu shu prinsipial uchrashuvda A Seriyadagi gollari hisobini ochar?
Mezbonlar tarkibida Mattia De Shilodan boshqa barcha futbolchilar shay holatda. Indzagi esa, hali ham Marusich, Luis Filipe, hamda Rikardo Kishnaning xizmatlaridan foydalana olmaydi.
NAPOLI - MILAN (25 avgust, 23:30)
Sarrining ketishi, balki «Napoli»ning ambitsiyalariga zarba bo‘la olmas, chunki Karlo Anchelotti har tomonlama top-murabbiy va o‘tgan turda Rimda g‘alaba qozonib, «Napoli» bu safar ham oson taslim bo‘lmasligini namoyish qildi. Bu davoni isbotlash uchun «Milan» juda munosib va kuchli raqib.
Milanliklar bu yoz ham o‘tgan safargidek transfer bozorida faol bo‘lishdi, lekin bu yilgi xaridlar kattaroq va aqlliroq bo‘lganini ta'kidlash kerak. Bonuchchi «Yuventus»ga qaytib ketgan bo‘lsada, Gonsalo Iguain va Temue Bakoyoko kabi yulduz futbolchilarning safga qo‘shilishi «Milan»ning niyatlari juda jiddiy ekanini ko‘rsatadi. So‘nggi pallagacha Sergey Milinkovich-Savich borasida ham muzokaralar bo‘lib o‘tganini alohida eslash mumkin. Ha, bir paytlar Neapolning ishongan tog‘i bo‘lgan Gonsalo Iguainning avval «Yuventus», endi «Milan» libosida «Napoli» maydonida to‘p surishi muxlislar uchun og‘ir sinov bo‘lsa kerak.
Genuyadagi baxtsiz hodisa tufayli, o‘tgan turda ushbu shahar jamoalari maydonga tushmadi, shu tufayli «Milan»ning ham «Jyenoa»ga qarshi o‘yini boshqa kunga qoldirildi. Demak Jyennaro Gattuzoning yangi jamoasi ilk sinovini 2-turda o‘tkazadi. «Milan»ning «Napoli» ustidan to‘rt yildan buyon g‘alaba qozona olmayotganini e'tiborga olsak, juda qiyin, lekin munosib chaqiriq.
SeVILYa - VILYaReAL (25 avgust, 23:15)
Ispan futboli shinavandalari uchun yana bir sovg‘a. Yevrokuboklar uchun kurashishi mumkin bo‘lgan ikki jamoa dastlabki turlardanoq ro‘baro‘ kelmoqda.
«Vilyareal»ga 1-turda ham oson raqib uchramadi. «Real Sosedad» klubini qabul qilgan «sariq submarinalar» 1:2 hisobida imkoniyatni boy berib qo‘yishdi. «Sevilya» esa, Madridda «Rayo Valekano» ustidan yirik g‘alabaga erishib, to‘plar nisbati bo‘yicha turnir jadvalida peshqadam bo‘lib oldi.
Jamoalar o‘rtada kechgan so‘nggi uchrashuvlar juda murosasiz kechgan bo‘lsa-da, natijalar borasida «Sevilya»ning yaqqol ustunligini ko‘rishimiz mumkin. O‘zaro besh o‘yindan beri andalusiyaliklar mag‘lubiyat nimaligini bilmay kelmoqda. Qizig‘i, o‘tgan mavsumdagi har ikkala uchrashuv davomida «Vilyareal» 2:0 hisobida oldinga chiqib olgan, ammo yakunda bir o‘yinda raqib hisobni tenglashtirishning uddasidan chiqqan bo‘lsa, Vilyarealdagi o‘yinda «Sevilya» 3:2 hisobida g‘alaba qozongan. Har ikki o‘yinda ham hakamlar qizil kartochkani cho‘ntaklaridan chiqarishga majbur bo‘lishgandi. Ya'ni, bu safar ham juda qizg‘in va keskin kurash bo‘lishiga asoslar yetarli.
«Sevilya»da hali ham Sebastiyan Korshya tarkibga qaytgani yo‘q. Mehmonlardan esa, Bruno Soriano tizzasidan jarohat olgan, shuningdek, Bonera va Fuyego tiklanish jarayonida bo‘lsalar-da, bu o‘yinda sheriklariga yordam bera olishmasa kerak.
JIRONA - ReAL (27 avgustga o‘tar kechasi, 01:15)
«Real»ning ushbu mavsumda Kataloniyaga ilk safari Jironaga bo‘ladi. Bu o‘yin alohida e'tiborga molik ekanining sababi, o‘tgan yili «Jirona» «Real» ustidan o‘z maydonida ajoyib g‘alabaga erishgan edi. Birinchi turda aytarli qiyinchilikka uchramagan Lopategi jamoasi uchun milliy chempionatdagi birinchi sinov aynan Jironada bo‘lishi shubhasiz.
Mehmonlardan tarkibda muammo yo‘q, Alvaro Odriosoladan tashqari hamma tayyor. Jironaliklardan esa, tajribali futbolchi Kristian Stuanining maydonga tushishi so‘roq ostida.
MANCheSTeR YuNAYTeD - TOTTeNHEM (27 avgust, 23:55)
Angliyada kamida oltita top klubning bo‘lishi deyarli har turda mana shunday katta o‘yinlarning mavjud bo‘lishini ta'minlaydi. O‘tgan turdagi London derbisidan so‘ng, mana, yana bir jiddiy raqiblar - «MYu» va «Tottenhem» o‘zaro to‘qnash kelmoqda.
Pochettino odatdagidek, mavsumni kichikrok jamoalar ustidan g‘alabalar bilan boshladi. «Manchester Yunayted» esa, muammolar girdobida o‘ralashib qolgan. Eng yomoni, aynan asosiy muammo nima ekani haqidagi fikrlar ham yakdil emas. Kimdir Mourinoning eskirgan uslubidan ayb axtarsa, boshqasi, bosh murabbiyni transferlar yordamida qo‘llab-quvvatlamagan klub rahbariyatini ayblaydi. Nima bo‘lgandayam, Braytondagi mag‘lubiyatdan keyin juda nozik davrni boshidan kechirayotgan «MYu»ning bu o‘yinda mag‘lub bo‘lishga haqqi yo‘q.
Statistika ham go‘yoki, mezbonlar tarafida. «Tottenhem» «MYu» maydonida g‘alaba qozonishni qo‘ying, so‘nggi golini urganida «Old Trafford»ning eng muhim kursisida David Moyyes o‘tirardi. Shundan keyin Lui Van Gaal (1:0, 3:0) va Joze Mourino (1:0, 1:0) ikki martadan g‘alaba qozondi, «Tottenhem» esa, har safar juda hujumkor va chiroyli o‘yin ko‘rsatganiga qaramasdan, mag‘lub bo‘lib qaytaverdi. O‘tgan turda o‘z faoliyatida ilk marotaba avgust oyida gol urishning uddasidan chiqqan Harri Keyn balki bu safar jamoadoshlariga boshqa qora an'anaga chek qo‘yishga barham berar?
Tarkiblarga kelsak, «Tottenhem»da Xyon Min Sonning Osiyo o‘yinlariga ketganini (yo kelganini) aytmasak, hamma joyida. «Manchester Yunayted» esa, asta-sekin jarohatlar girdobidan qutulmoqda. Mavsumni boshlay olmagan Nemanya Matich va Antonio Valensiya aynan shu o‘yinda safga qaytishi kutilmoqda. Shuningdek, mashg‘ulotlardagi jarohati tufayli Braytonga bora olmagan va sentabrgacha qaytmasligi aytilgan Aleksis Sanches ham bu o‘yinda tarkibdan joy olishi mumkin ekan.
