Prezident sovrini uchun kurash bo‘yicha I Xalqaro turnir o‘tkaziladi. Sovrin jamg‘armasi - 100 ming dollar

2018 yil 5-7 sentabr kunlari Toshkent shahridagi “O‘zbekiston” sport majmuasida O‘zbekiston Respublikasi Prezidenti sovrini uchun kurash bo‘yicha I Xalqaro turnir o‘tkaziladi. Kun.uz’ga ma'lum bo‘lishicha, Vazirlar Mahkamasining bu haqdagi tegishli farmoyishi qabul qilindi.

Turnir doirasida seminar-trening ham o‘tkaziladi. O‘zbekiston Respublikasi Prezidenti sovrini uchun kurash bo‘yicha I Xalqaro turnirni o‘tkazishga tayyorgarlik ko‘rish va uni o‘tkazish bo‘yicha tashkiliy qo‘mita hamda xarajatlar smetasi tasdiqlandi.

Qayd etilishicha, xarajatlar Toshkent shahar hokimligi mahalliy byudjyetining qo‘shimcha manbalari va homiylik xayriyalari hisobidan qoplanadi. 2018 yil 6 sentabr - “Kurash” milliy sport turi kunini keng nishonlash yuzasidan joylarda kurash bo‘yicha musobaqalar va seminarlar, shuningdek, jahon chempionlari ishtirokida ko‘rgazmali chiqishlar tashkil etiladi.

Ma'lum bo‘lishicha, xalqaro turnirda l-o‘rin uchun 50 000 AQSh doll. (Prezident sovrini), 2-o‘rin uchun 25 000 AQSh doll., 3-o‘rin uchun x 2 kishi x 10 000 AQSh doll., 5-8-o‘rin uchun x 4 kishi x 1 250 AQSh doll. miqdorida pul mukofotlari beriladi.

Musobaqaning umumiy mukofot jamg‘armasi 100 000 AQSh dollari.