«Vilgud» asoschilaridan biri Barno Tursunova bolalarda tadbirkorlik qobiliyatini rivojlantirish bo‘yicha o‘z tajribasini o‘rtoqlashadi. U o‘z ustunchasida oilasi misolida to‘rt vaziyatni tasvirlab, ularning uch nafar farzandida biznes-ko‘nikmasini shakllantirishga hissa qo‘shganini tushuntiradi.
«Men va turmush o‘rtog‘im Sherzod Tursunov – seriyali tadbirkorlarmiz. Biz milliard savdo aylanmasiga ega ikkita kompaniya - «Yevrodizayn» va «Vilgud»ga asos soldik. Biznesda innovatsiyalarni qo‘llab-quvvatlaymiz, hayotda esa an'analarga amal qilamiz. Biz uchun oila - birinchi o‘rinda.
Farzandlarimiz – Shirin, Azamat va Azizga bolaligidanoq tadbirkorlik ko‘nikmalarini singdirishga harakat qilamiz. Ular oilaviy kompaniyani rivojlantirishlari uchun emas (ular kelajakda nima bilan shug‘ullanishni o‘zlari hal etishlari mumkin), balki tafakkurning muayyan turini o‘rgatish – nostandart yechimlar topish, narsalarga noodatiy burchakdan nazar solish, muzokaralar olib borish uchun. Bolalarda tadbirkorlik xislatlarini qanday rivojlantirayotganimiz aks etgan vaziyatlar quyidagicha:
1-vaziyat
Bu yil yoz faslida kichik o‘g‘limizni bozorda ishlash uchun Toshkentga yubordik. U sotishni o‘rganib, narxni aytishdan qo‘rqmaslikka o‘rganishini istadik. Dastlab ishga chiqish uchun o‘rnatilgan maosh oldi.
Biroq bu uni rag‘batlantira olmagani uchun unga har bir kelishuv uchun haq to‘lashga kelishdim.
Dastlab bunga ko‘nikishi qiyin bo‘ldi. Uchinchi kuni mavjud sharoitlarda yashashga majbur ekanini tushunib, mahsulotni faol tarzda taklif etishni boshladi. Natijada o‘rnatilgan maosh olib ishlayotgan tengdoshlariga qaraganda ikki marta ko‘proq pul ishlay boshladi.
Biz nima uchun buni amalga oshirdik: farzandlarimiz uchun sun'iy tarzda murakkab vaziyatlarni yaratishga harakat qilamiz. Maqsad – har bir narsaning qadrini tushuntirish. Ana o‘shanda mehnat va pulni qadrlashni o‘rganadilar.
2-vaziyat
Oilamizda «ikkita vazifa» tamoyili bor. Bu bolalarda asosiydan tashqari qo‘shimcha vazifa borligini anglatadi. Masalan, o‘rta maktabni tugatish va xorijiy tilni o‘rganish. Ular bu vazifani yechish yo‘llarini o‘zlari o‘ylab topishlari lozim. Masalan, katta qizimiz va o‘rtancha o‘g‘limiz yarim yilni masofadan o‘qishga o‘tkazish va tilni o‘rganish uchun AQShga yuborishni taklif qilishdi. Qaytgach, ular yilni a'lo baholar bilan yakunlashdi. Erkin ingliz tili esa bonusga aylandi.
