AQShga safarimiz chog‘ida turli manzillarda bo‘ldik. Ulardan biri “Chikago” o‘zbek-amerika assotsiatsiyasidir. Okean ortida yashovchi vatandoshlarimiz tomonidan asos solingan tashkilot faoliyati bilan yaqindan tanishishni istadik.
Mazkur tashkilot Amerikadagi o‘zbek vatandoshlarini birlashtirgan. Tashkilot asrlardan asrlarga o‘tib kelayotgan o‘zbek urf-odatlari, qadriyatlari va ona-tilini asrab qolishda muhim ahamiyat kasb etmoqda. AQShdagi o‘zbek oilalarida vatanga hurmat va fidoyilikni targ‘ib qilishlari quvonarli hol. Safar chog‘ida assotsiatsiya prezidenti Olim Sharipovdan ham intervyu oldik.
- Avvalambor, sizlarni mana shu yerga tashrif buyurishingiz biz uchun quvonchli hodisa bo‘ldi. Chikagodagi o‘zbek-amerika assotsiatsiyasi 2009 yilning yanvaridan boshlab o‘z faoliyatini olib bormoqda. Bu yerda bir kishi bor. U kishi AQShda 1979 yildan buyon istiqomat qiladi. Millati o‘zbek. Ismlari Sirojiddin Nasafiy. Tashkilot mana shu insonning tashabbusi bilan dunyo yuzini ko‘rdi. Hozir u kishining yoshlari 70dan oshdi. U kishi juda vatanparvar zot. Shu sababmi, doim bizga: “O‘zbekliklaringni, tillaringni, dinlaringni yo‘qotmanglar. Siz yo‘qotmasligingiz mumkin, ammo farzandlaringiz yo‘qotishi mumkin”, deb nasihat qiladilar.
Biz assotsiatsiya faoliyatini olti bo‘limga bo‘lgan holda bajaryapmiz. Birinchisi madaniyat bo‘limi bo‘lib, uning faoliyatiga turli festivallar, Navro‘z, O‘zbekiston mustaqilligi bayrami, ikkita Hayit bayrami va shunga o‘xshash tantanalarni o‘tkazish kiradi. Ikkinchi bo‘limimiz millatlararo aloqalar bo‘limidir. Bundan tashqari, sport, xotin-qizlar, ta'lim-tarbiya bo‘limlari ham faoliyat yuritib keladi.
Assotsiatsiyani AQSh hukumati qaydidan o‘tkazish uncha qiyin bo‘lmadi. O‘zimizning qonun-qoidalarimizni tuzib chiqdik. Huquqshunos yordam berdi, juda oson bo‘ldi. Biz hech qanday soliq to‘lamaymiz, ulardan ozodmiz. Biroq davlat tomonidan moddiy ko‘mak ham ko‘rsatilmaydi. Biz tashkilot a'zolari va xayrixoh insonlarning homiyligi asosida ish olib boryapmiz.
Olim Sharipov bugungi O‘zbekiston hayoti, olib borilayotgan siyosatga o‘z munosabatini bildirar ekan, jumladan, shunday dedi:
