Dunyoning eng boy odami Jyeff Bezos xayriya jamg‘armasiga asos soldi

Dunyoning eng boy odami, Amazon internet-riteyleri asoschisi va egasi Jyeff Bezos boshpanasiz oilalarga yordam berish va maktabgacha ta'lim muassasalari qurish uchun xayriya jamg‘armasiga asos solganini e'lon qildi. 

“Biz Bezos Day One Fund tashkil etilganini e'lon qilishdan xursandmiz”, deb aytilgan Bezosning tvitterda joylashtirgan xabarida. U jamg‘armaning boshlang‘ich kapitali 2 mlrd dollarni tashkil qilishini qo‘shimcha qilgan.   

Bezosning aytishicha, jamg‘arma ikki yo‘nalishda ish olib boradi: yosh boshpanasiz oilalarga yordam beruvchi tashkilot va fuqarolik guruhlarini qo‘llab-quvvatlash va aholi past daromadga ega bo‘lgan hududlarda sifatli ta'lim beruvchi maktabgacha ta'lim muassasalari tarmog‘ini yaratish. 

Amazon 1994 yilda tashkil etilgan va bugungi kunda internet orqali tovar va xizmatlar sotuvchi dunyodagi eng yirik kompaniya hisoblanadi. Kompaniyaning 2004 yildagi oboroti 7 mlrd dollarni tashkil qilgan bo‘lsa, 2016 yilda bu qiymat 136 mlrd dollarga yetgan.