Iroq janubidagi Basra viloyatida 27 ming kishi ichimlik suvidan zaharlandi, deb xabar berdi Al-Sumaria telekanali Iroq vakillar palatasi rahbarining birinchi o‘rinbosari Hasan al-Kaabiyga tayanib.
Avvalroq Basra shahri sog‘liqni saqlash bo‘limi bosh direktori Riyod Abd al-Amir 14 ming kishi jabrlangani haqida ma'lum qilgandi.
"Basra viloyatida 27 ming kishi ifloslangan suvdan zaharlanishi jiddiy hodisa hisoblanadi", — dedi amaldor.
Al-Kaabiy viloyatga investitsiyalar kiritish zarurligini tasdiqladi va viloyat aholisi uchun ish o‘rinlari yaratishga chaqirdi.
Iroqning Basra viloyatida 8 iyuldan buyon ishsizlik va kommunal sohadagi muammolarga qarshi namoyishlar o‘tkazilmoqda. Namoyishchilar hukumatdan elektr va suv ta'minotidagi uzilishlarga chek qo‘yishni talab qilishmoqda.