Prokuratura xodimiga pora taklif qilgan shaxsga nisbatan jinoyat ishi qo‘zg‘atildi

Hazorasp tuman prokurorining katta yordamchisi lavozimida ish o‘rganuvchi A.Po‘latov viloyat prokurori nomiga bildirgi bilan murojaat qilib, unda Xazorasp tumanidagi «Davlatyorov Yo‘ldosh Bekturdi» fermer xo‘jaligi faoliyatida qonun buzilishi holatlari aniqlanganligi sababli, fermer xo‘jaligining norasmiy rahbari  Y.Bekturdiyev ushbu holatni uning foydasiga hal qilib berish evaziga 3000 AQSh dollari taklif qilganligini bildirgan.

Bosh prokuratura matbuot xizmati xabariga ko‘ra, ushbu bildirgi asosida Xorazm viloyat prokuraturasi tomonidan o‘tkazilgan tezkor tadbirda, fuqaro Y.Bekturdiyev A.Po‘latovga uning xizmat xonasida 2000 AQSh dollarini pora tariqasida bergan vaqtda ashyoviy dalillar bilan ushlangan.

Mazkur holat yuzasidan Y.Bekturdiyevga nisbatan O‘zbekiston Respublikasi Jinoyat kodeksining 211 moddasi 1-qismi bilan jinoyat ishi qo‘zg‘atilib, tergov harakatlari o‘tkazilmoqda.

Eslatib o‘tamiz, avvalroq prokurorga pora taklif qilgan shaxs ushlangandi.