Abdulla Aripov Yunusobod tumani sobiq hokimining qarorini bekor qildi

Toshkent shahrida qurilish va obodonlashtirish ishlarini amalga oshirish masalalariga bag‘ishlangan sayyor yig‘ilishda O‘zbekiston Respublikasi bosh vaziri Abdulla Aripov ishtirok etdi, deb yozmoqda O‘zA.

Majlisda Yunusobod tumanidagi “Matonat” mahalla guzari binosi qurilishi uchun yer maydoni ajratish to‘g‘risidagi Yunusobod tumani hokimi tomonidan qabul qilingan qaror bekor qilindi. 

Qurilish ishlari to‘xtatilib, qurilish maydoni hududi obodonlashtirilmoqda, uning o‘rnida bolalar maydonchasi bunyod etilyapti. Ushbu ishlarning nihoyasiga 5 kun muhlat berilgan. 

Eslatib o‘tamiz, joriy yilning 11 sentabr kuni Yunusobod tumani hokimi Baxtiyor Abdusamatov katta miqdordagi pora bilan qo‘lga olingani xabar qilindi.

Manbaning ma'lum qilishicha, B.Abdusamatov investorga joy taqdim etish maqsadida 400 ming AQSh dollari miqdoridagi pulni pora tariqasida olayotgan vaqtida ushlangan.