Qirg‘iziston TIV mamlakatning Koreyadagi elchisi Qilichbek Sultonni diplomatik axloq me'yorlarini buzishda aybladi. Elchi Seulda yuqori mansabli qirg‘izistonlik amaldorning samolyotda janjal ko‘targani tafsilotlarini ommaga e'lon qilgan, deb xabar berdi Tengrinews.kz.
Avvalroq OAV Qirg‘iziston mehnat va ijtimoiy rivojlanish vaziri o‘rinbosari Zuurakan Kadenova “Eyr Astana” aviakompaniyasining Seul-Olmaota yo‘nalishi bo‘yicha parvoz qilishi kerak bo‘lgan samolyotda janjal chiqargani haqida xabar bergandi. Guvohlarning ta'kidlashicha, yuqori lavozimli amaldor bort kuzatuvchilar bilan janjallashib, ularga diplomatik pasportini ko‘rsatgan. Oqibatda ekipaj sardori ayolni reysdan olishga qaror qilgan. O‘sha kuniyoq mamlakat bosh vaziri Kadenovani lavozimidan ozod qilgandi.
Foto: 24.kg
Dushanba kuni Qirg‘izistonning Koreyadagi elchisi Qilichbek Sulton Bishkekda matbuot anjumani o‘tkazib, vazir o‘rinbosari bilan bog‘liq voqea tafsilotlarini ma'lum qildi. U Qirg‘iziston prezidenti ma'muriyatidan qo‘ng‘iroq qilishib mazkur voqea haqida gapirmaslikni talab qilishganini aytgan. Shuningdek Qilichbek Sulton TIV rahbariyati va Qirg‘izistonning Malayziyadagi elchixonasi xodimlari 2015-2016 yillarda qator qonunbuzilishlarga yo‘l qo‘yishganini ma'lum qilgan.
Qirg‘iziston TIV Qilichbek Sulton "yana bir bor davlat xizmatchilarining o‘zini tutish tartibini nazorat qiluvchi qonunchilik me'yorlarini va diplomatik axloq me'yorlarini buzganini ta'kidladi. Vazirlik shuningdek, elchining o‘zi xizmat vazifasida qonunchilikni buzgani haqida ma'lumotlar borligini, ular tekshirib chiqilib tegishli organlarga topshirilishini bildirdi.
Elchining o‘zi prezident Sooronbay Jeenbekov fuqarolarni korrupsiya haqida ochiq gapirishga chaqirganini, shuning uchun mamlakat tashqi ishlar mahkamasidagi qonun buzilishlari haqida ochiqchasiga gapirganini aytdi va prezident uni qo‘llab-quvvatlashiga umid bildirdi.
