Iqtisodiyot vazirligi huzurida yangi markaz tashkil etiladi

O‘zbekiston Respublikasi Iqtisodiyot vazirligi huzurida Sanoat bozorlari va eksportga yo‘naltirilgan mahsulotlarni ishlab chiqarish tadqiqotlar markazi davlat unitar korxonasi shaklida tashkil etish.

Bu haqda prezidentning jamoatchilik muhokamasi uchun e'lon qilingan “Savdoni yanada liberallashtirish va tovar bozorlarida raqobatni rivojlantirish chora-tadbirlari to‘g‘risida”gi qarori loyihasida aytiladi.

Belgilanishicha:

Markazning ta'sischisi O‘zbekiston Respublikasi Iqtisodiyot vazirligi hisoblanadi;

Markaz boshqaruv xodimlari 38 shtat birligida bo‘ladi;

Markaz O‘zbekiston Respublikasining davlat byudjyeti mablag‘lari hisobidan moliyalashtiriladi.

Markazning vazifalari orasida respublikada ishlab chiqarilayotgan va import qilinayotgan tovarlar turlari hamda nomenklaturasi haqida xo‘jalik yurituvchi sub'yektlarga axborot berish maqsadida muntazam yangilanib turadigan elektron axborot portalini yaratish bor.

Shuningdek, markaz ishlab chiqarish quvvatlari va tovarlar ishlab chiqarish bo‘yicha taklif haqida ma'lumotlar bazasini shakllantiradi. Bu mahalliy va xorijiy yetkazib beruvchilar hamda ishlab chiqaruvchilarni xabardor qilishga qaratilgan bo‘ladi;

Bundan tashqari, narx-navolar tahlil qilinadi va monitoringini o‘tkaziladi, tovar bozorlarida talab hamda taklif tebranishlari o‘rganib boriladi va bu asosda takliflar kiritiladi.