Mourino uchun oxirgi imkon, Ronaldusiz «Yuventus». YeChL o‘yinlari anonsi

Bugun, 2 oktabr kuni Yevropa Chempionlar Ligasining 4 guruhida 2-tur o‘yinlari bo‘lib o‘tadi. «Manchester Siti» dastlabki turdagi mag‘lubiyatdan keyin Germaniyada vaziyatni o‘nglashga urinsa, «MYu» Valensiya sardorligi ostida «Valensiya»ni qabul qiladi. Shu va boshqa o‘yinlar anonsini e'tiboringizga havola qilamiz.

Ye GURUHI

BAVARIYa – AYaKS
Myunxen. «Alyants Arena». 23:55.Hakam: Pavel Kralovets (Chexiya)

AYeK – BeNFIKA 
Afina. «Olimpiko Sbadio Spiros Luis». 23:55.Hakam: Orle Grinfild (Isroil)

«Bavariya» va boshqalar» deb nomlash mumkin bo‘lgan Ye guruhida Kovach shogirdlari «Ayaks»ni qabul qiladi. Niderlandiyaliklar ilk o‘yinda AYeK ustidan juda chiroyli yirik g‘alabaga erishdi va keyingi bosqichga chiqish uchun asosiy da'vogar ekanliklarini namoyish qilishdi. «Benfika» oldida yana bir qo‘shimcha ustunlikka ega bo‘lish uchun bugun ochko olish zarar qilmaydi.

Bir qaraganda, «Bavariya»dan ochko olishning ayni payti. Mavsumni juda kuchli boshlagan «Bavariya» o‘tgan haftani juda yomon o‘tkazdi va Bundesligadagi yakkahokimlikni boy berdi. Avvaliga, Myunxenda «Ausburg»ga qarshi o‘yindagi durang ko‘pchilik uchun kutilmagan holatdek baholangan bo‘lsa, uch kun o‘tib Berlinda «Herta»dan mag‘lubiyatga uchragan jamoa «Borussiya»ni birinchi o‘ringa o‘tkazib yubordi. Shu tufayli, mezbonlarda ortiqcha bosim paydo bo‘lgani tabiiy – yana bir omadsiz uchrashuv va keyin, jamoa atrofida salbiy fikrlar ko‘paya boshlaydi.

«Ayaks» esa, yaxshi sport formasida, ayniqsa, hujumni tashkil qilish va gol urish borasida muammo yo‘q. Amsterdamliklar so‘nggi 11 o‘yinning 8tasida g‘alaba qozonishdi va g‘alabalarning 6tasi yirik hisobda amalga oshdi.

Niko Kovach ham, Erik Den Hag ham uzoq muddatga safdan chiqqan (Tolisso, Koman – Singraven, Veltman) futbolchilarni aytmasa, asosiy tarkibdan to‘liq foydalanishlari mumkin. Mezbonlar tarkibida faqat Leon Goretskaning maydonga tushishi so‘roq ostida.

Afinada birinchi turning omadsiz jamoalari to‘qnash keladi. Bu o‘yinda mag‘lubiyatga uchragan jamoa pley-offga ega chiqish uchun o‘z imkoniyatini deyarli nolga tenglashtirib qo‘yadi. Portugaliya chempionatida turnir jadvalini boshqarib turgan «Benfika» oxirgi turda kutilmaganda, «Shavish» bilan durang o‘ynab qo‘ydi va uchinchi o‘ringa tushib ketdi. Bu uchrashuv YeChLning mana shu bugungi o‘yini uchun «qurbon qilingan» bo‘lish ehtimoli yuqori.

F GURUHI

HOFFeNHAYM – MANCheSTeR SITI
Zinsxaym. «Virzol-Reyn-Nekkar Arena». 21:55. Hakam: Damir Skomina (Sloveniya)

LION – ShAXTYoR
Lion. «Grupama Stadium». 23:55. Hakam: Andris Traymanis (Latviya)

Ko‘rinishidan yuqorida ancha sokin bo‘lib, asosiy kurash 2-o‘rin uchun ketishi taxmin qilingan bu guruhda hammasi o‘zgarib ketdi. «Lion» safarda «Manchester Siti» ustidan g‘alaba qozonib, muvozanatni o‘zgartirib yubordi. To‘g‘ri, hali ham Gvardiola jamoasi tizginni o‘z qo‘liga olishi mumkin, ammo endi buning uchun murabbiyning o‘z iborasi bilan aytganda, «shaharliklar» jamoasi endi beshta finalda maydonga tushishlariga to‘g‘ri keladi.

Dastlabki sinov Bundesliganing kamtargina «Hoffenhaym» klubiga qarshi kechadi. «Hoffenhaym» ichki chempionatda muammolarga (6 turdan 3 mag‘lubiyat: 12 –o‘rin) uchrab turgan bo‘lsa-da, Ligani qoniqarli boshladi. «Shaxtyor» maydonida hisobda oldinda borgan holatda durang o‘ynashni g‘alabaga qiyoslash mumkin. Buning ustiga, nemislar jamoasining bir qator futbolchilari jarohat tufayli hali ham tarkibdan chetda ekanliklarini ta'kidlash kerak. Hyubner, Nordveyt, Rupp, Amiri shular jumlasidan.

«Manchester Siti» Angliyada ancha qulay taqvimdan foydalanib, maksimalga yaqin ochkolarni to‘plab bormoqda va ikki raqobatchi klub - «Liverpul» va «Chelsi»ning durangidan foydalanib, 1-o‘ringa chiqib oldi. Yana bir yaxshi xabar: jamoa yetakchisi Kevin de Bryuyne mashg‘ulotlarni boshlab yubordi. Ushbu o‘yinda u sheriklariga yordam bera olmasa-da, uning qaytishining o‘zi jamoaga ijobiy turtki berishi tabiiy. Asosiy tarkib o‘yinchilaridan Serxio Aguero bu o‘yinda maydonga tushmasligi mumkin. Tovonidan jarohat olgan hujumchi YeChL o‘yinida qatnashishi so‘roq ostida turibdi.

Ikkinchi juftlik yanada keskinroq kurashni namoyish etib berishi kutilmoqda.  Boshidanoq bu ikki klub ikkinchi yo‘llanma uchun asosiy da'vogarlar sifatida tilga olingandi. «Lion» Manchesterdagi g‘alaba evaziga o‘z imkoniyatini oshirib olgan bo‘lsa, «Shaxtyor»ga uy o‘yinidagi durang qimmatga tushishi mumkin. Keyingi ikki turda raqib «Manchester Siti» bo‘lishini e'tiborga olsak,  ukrainaliklar jamoasi bu o‘yinda maksimal ochko uchun harakat qilishlari kerak bo‘ladi.

O‘yin yopiq, jazo tariqasida «Lion» uy uchrashuvini muxlislarsiz o‘tkazishi ko‘zda tutilgan. «Shaxtyor» ustozi aslida to‘liq stadionda o‘ynashni istashini aytayotgan bo‘lsa-da, mezbonlarning o‘n ikkinchi o‘yinchisi yo‘qligi «konchilar»ga qo‘shimcha imkoniyat yaratishi turgan gap. «Shaxtyor» Fransiya jamoalariga qarshi kechgan 11 o‘yinning 7tasida g‘alaba qozongan. «Lion»ning statistikasi yanada ijobiy – Ukraina jamoalariga qarshi 4 o‘yinda 3 g‘alaba va 1 durang. Birorta ham gol o‘tkazib yuborilmagan. «Shaxtyor» va «Lion» yevrokuboklarda ilk marotaba to‘qnash kelishmoqda.

G GURUHI

TsSKA – ReAL
Moskva. «Lujniki» stadioni. 23:55. Hakam: Ovidiu Hatsegan (Ruminiya)

ROMA – VIKTORIYa
Rim. «Stadio Olimpiko». 23:55. Hakam: Pavel Raskovski (Polsha)

«Real» bilan o‘ynashning ayni payti. Rossiyada bir qator jurnalistlar va muxlislar Madridning bugungi kichik inqirozidan foydalanib qolish mumkinligi haqida bong urmoqda. «Roma» bilan ikki o‘yin oldidan imkon qadar ko‘proq ochkoga ega bo‘lish pley-off yo‘llanmasi uchun kurashda qo‘l keladi.

To‘g‘ri, har qanday holatda ham, ispan klubi armiyachilardan bir bosh baland turaveradi, ammo bugungi holatga qo‘shimcha sifatida «Lujniki»ning «Real»ga noqulay stadion ekani haqida ham yozishmoqda. «Real» bu stadionda to‘rt marta maydonga tushgan va uch martasida mag‘lubiyat alamini totishga majbur bo‘lgan. Asr boshlarida ikki marta «Spartak» va bir marta «Lokomotiv» madridliklar jamoasini mag‘lub etgandi.

TsSKA esa besh yil oldin, Slutskiy qo‘l ostida to‘p surib yurgan paytlarda «Real» bilan pley-offda to‘qnash kelgan va Moskvadagi o‘yin 1:1 hisobida yakunlangan.  Armiyachilarning bugungi ustozi Goncharenko esa, BATEni «Real»ga qarshi maydonga olib chiqqan va ikki marta mag‘lubiyatga uchragan ekan.

Haqiqatan ham, «Real» muammolar girdobiga tushib qoldi. La Ligada so‘nggi 4 turda atigi bir marta g‘alaba qozondi xolos. Avval Isko ko‘richagini operatsiya qildirib safdan chiqqan bo‘lsa, Marselo, Beyl kabi futbolchilarning ham TsSKAga qarshi o‘yinda jamoaga yordam bera olmasliklari ma'lum bo‘ldi. Shuningdek, jamoa sardori Serxio Ramos ham Rossiyaga kelmagan. Bosh murabbiy bu holatni Ramos mavsum boshidan buyon juda ko‘p o‘yinlarda maydonga tushgani va bu o‘yinda himoyachiga dam berishga qaror qilgani bilan izohladi.

«Roma» o‘tgan turda Madridda yirik hisobda mag‘lubiyatga uchragan bo‘lsa-da, buning u qadar dahshatli tomoni yo‘q. «Bernabe»da ochko olish guruhdagi boshqa jamoalar rejasiga ham kiritilmagan, demak «Roma»ning asosiy vazifasi TsSKA va «Viktoriya»ga qarshi o‘yinlarda ustunlik qilish. Guruhdan chiqishning eng real va oson yo‘li shu.

«Roma» har tomonlama Chexiya jamoasidan ustun va bu o‘yinda g‘alaba qozonish uchun rimliklar o‘z ichki muammolarini hal qilib olishlari kerak bo‘lardi. Olti o‘yinda g‘alaba nimaligini bilmagan Di Franchesko jamoasi nihoyat, vaziyatni o‘nglab oldi va A Seriyada qatorasiga ikki g‘alabaga erishdi. Ayniqsa, Rim derbisida qo‘lga kiritilgan ishonchli g‘alaba YeChL o‘yini oldidan jamoa ruhiyatini yanada oshirgan bo‘lishi tabiiy.

H GURUHI

YuVeNTUS  - YaNG BOYZ
Turin. «Allians Stadium». 21:55. Hakam: Sergey Karasev (Rossiya)

MANCheSTeR YuNAYTeD – VALeNSIYa
Manchester. «Old Trafford». 23:55. Hakam: Slavko Vinchich (Sloveniya)

«Valensiya»ga qarshi o‘yinga bag‘ishlangan matbuot anjumanida Joze Mourino yarim soatga yaqin vaqt mobaynida jurnalistlarning savollariga javob berdi, ammo bu savollarning aksari «Valensiya» haqida emasdi. So‘nggi o‘yindagi omadsizliklar, Pogba, Sanches va boshqalar bilan muammolar – Manchester klubi bilan bog‘liq salbiy ma'lumotlar va jumboqlar shu qadar ko‘pki, uning fonida «Valensiya» ko‘rinmayapti ham.

Xorij nashrlari Mourino o‘z lavozimini tark etish arafasida ekanini yozishmoqda. Uning o‘zi «Vest Hem»ga qarshi mag‘lubiyatli o‘yindan keyin shunday dedi: «Men oldinga qarashda davom etaman va seshanba kungi o‘yinga tayyorlanaman. Umid qilamanki, futbolchilar, ularning hammasi bo‘lmasa ham, shu yo‘nalishda ishlashadi».

Shu kunlarda BeIN Sports telekanali «MYu» Zinedin Zidan bilan muzokaralarni boshlagani haqida xabar tarqatdi.

«MYu» premer-liga startida 3ta o‘yinda mag‘lub bo‘ldi va 7 turdan keyin 10-o‘rinda joylashgan. Mourino yevrokuboklarda muvaffaqiyatli ishtirok etish orqali iste'fodan qutulib qolishi mumkin. Murabbiyning taqdiri «Valensiya»ga qarshi o‘yin natijasiga bog‘liq bo‘lib qolmoqda.

Ingliz klubidagi vaziyat ispan klubiga qo‘l kelishi mumkin. «Valensiya» ham o‘z navbatida La Ligada muvaffaqiyatsiz to‘p surayotgan, 7 o‘yinda atigi 1 marta g‘alaba qozongan bo‘lsa-da, hozirda jamoada deyarli bosim yo‘q. Hammani faqat bir savol, «Manchester Yunayted»ning inqirozi qanchalik chuqur ekani o‘ylantirmoqda.

«MYu» o‘z imkoniyatining qay darajasida to‘p surishini taxmin qila olmayman, baribir g‘alaba qozonish uchun biz yaxshi o‘ynashimiz kerak», – dedi mehmonlar ustozi. Ruben Uria shuningdek, «MYu»ning jismoniy tayyorgarlik bo‘yicha, Yevropaning eng yaxshi uch jamoasidan biri ekanini e'tirof etdi.

Joze Mourino ushbu o‘yinda Markus Roho va Eshli Yangga tayana olmaydi. Shuningdek, murabbiyning aytishicha, Ander Errera va Jyessi Lingardning bugungi holatlari ko‘ngildagidek emas. Boshqa hamma futbolchilar bugun «Old Trafford»da maydonga tushishi mumkin. «Valensiya» safida faqat Santi Mina tizzasidan olgan jarohati tufayli tarkibdan chetda qoldi.

«Yuventus» esa, o‘zining doimiy relsiga tushib oldi. Valensiyada bir kishi kam to‘p surib ham, uch ochko egasiga aylangan turinliklar endilikda guruhdan chiqish uchun ortiqcha muammolarga duch kelishmasa kerak. «Yang Boyz» ustidan g‘alaba Allegri jamoasi uchun joriy mavsumdagi qatorasiga to‘qqizinchi g‘alaba bo‘ladi. O‘z navbatida, «Yang Boyz» ham ichki chempionatda muammosiz to‘p surayotganini, o‘tkazilgan 9 turdan so‘ng, yuz foizlik natija bilan turnir jadvalini boshqarib kelayotganini ta'kidlash kerak.

Bu o‘yinda mezbonlar Krishtianu Ronalduning yordamidan foydalana olishmaydi. «Mestalya»dagi o‘yinda maydondan chetlatilgan portugaliyalik hujumchi bir o‘yinga diskvalifikatsiya qilingan.