Normativ-huquqiy hujjatlar loyihalari muhokamasi portalida Davlat soliq qo‘mitasining “Davlat soliq xizmati organlarida soliqqa oid huquqbuzarlik xavfini tahlil etish tizimini joriy etish tartibi to‘g‘risidagi nizomni tasdiqlash haqida”gi qarori loyihasi joylashtirildi.
Hujjat bilan Davlat soliq xizmati organlarida soliqqa oid huquqbuzarlik xavfini tahlil etish tizimini joriy etish tartibi to‘g‘risidagi nizom tasdiqlanishi mumkin.
Nizomga asosan soliqqa oid huquqbuzarlik xavfini tahlil etish tizimi davlat soliq xizmati organlarida amaliyotga joriy etilgan “Tahlika-tahlil” dasturiy mahsuloti asosida tadbirkorlik sub'yektlarini avtomatik tarzda inson omili aralashmagan holda tahlil qilish orqali amalga oshiriladi.
Dasturiy mahsulot xavfni tahlil etish tizimini davlat soliq idoralaridagi mavjud ichki va O‘zbekiston Respublikasi prezidentining 2012 yil 30 oktabrdagi “O‘zbekiston Respublikasi davlat soliq xizmati idoralari axborot-kommunikatsiya tizimi faoliyati samaradorligini yanada oshirish chora-tadbirlari to‘g‘risida”gi PQ-1843-son qaroriga asosan vazirlik va idoralar tomonidan taqdim etilgan tashqi ma'lumotlarga hamda veb saytlari va ijtimoiy tarmoqlardan olingan axborotlarga asosan quyidagi yo‘nalishlarda:
a) tadbirkorlik sub'yektlarining shaxsiy kartochkalarida soliq qarzdorligi mavjudligini;
b) soliq to‘lovchi yuridik shaxslar tomonidan soliq majburiyatlarini bajarilishida coliqlar va majburiy to‘lovlar bo‘yicha taqdim etilgan soliq hisobotlariga muntazam ravishda qayta hisob-kitoblarning amalga oshirilganligini;
v) soliq to‘lovchilar hisobot davri mobaynida dastlab ro‘yxatga olingan yuridik manzilini bir hududdan boshqa bir hududga muntazam ravishda o‘zgartirib borilganligini;
g) tadbirkorlik sub'yektlari tomonidan o‘zlariga tegishli bo‘lmagan to‘lov terminallari bilan foydalanilganligini;
d) jismoniy va yuridik shaxslar tomonidan aynan bir tadbirkorlik sub'yekti faoliyati to‘g‘risida kelib tushgan murojaatlarni;
ye) boshqa yo‘nalishlarni tahlil qiladi va o‘rganib chiqadi.
Dasturiy mahsulot Davlat soliq qo‘mitasi tomonidan belgilangan mezonlarga asosan tadbirkorlik sub'yektlari faoliyatini to‘liq o‘rganib chiqadi hamda yakuniy natijalarni ballik tizim orqali soliqqa oid huquqbuzarlik xavfi darajasini baholab beradi.
Dasturiy mahsulot orqali ballik tizimi tahlili tadbirkorlik sub'yektlari tomonidan soliqqa oid huquqbuzarlik sodir etish xavfi darajasi aniqlangan kamchiliklar summasi va holatidan kelib chiqib amalga oshiriladi.
