O‘zbekiston Respublikasi IIV Jinoyat qidiruv bosh boshqarmasi Korrupsiya va iqtisodiy jinoyatlarga qarshi kurashish boshqarmasidan olingan xabarga ko‘ra, shu yilning 3 oktabr kuni fuqaro A.S. Ichki ishlar vazirligiga ariza bilan murojaat qilgan.
Unda o‘zini Toshkent viloyati hokimligi Moliya bosh boshqarmasi boshlig‘ining o‘rinbosari deb tanishtirgan shaxs unga tadbirkorlik faoliyatini yo‘lga qo‘yish uchun Bo‘stonliq tumanidagi turizm uchun ajratilgan zaxira yerlardan 3 gektar yer maydoni olib berishga va'da qilib, evaziga oldindan 5000 AQSh dollari miqdoridagi pullarni berishini talab qilayotganligini ma'lum qilgan.
O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasining bildirishicha, shu kuni vazirlikning tezkor xodimlari tomonidan o‘tkazilgan tadbir davomida, Toshkent viloyati hokimligi Moliya bosh boshqarmasi boshlig‘ining birinchi o‘rinbosari lavozimida ishlovchi J.N. Toshkent shahrining Mirzo Ulug‘bek tumanidagi Parkent ko‘chasida ariza muallifidan 5000 AQSh dollari miqdoridagi pullarni olgan vaqtida ashyoviy dalil bilan ushlangan.
Ushbu holat yuzasidan IIV huzuridagi Tergov departamenti tomonidan O‘zbekiston Respublikasi Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, avvalroq Jizzax viloyat Moliya boshqarmasi boshlig‘i o‘rinbosari pora bilan qo‘lga tushgani xabar berilgandi.
