Jizzax viloyat Moliya boshqarmasi boshlig‘i o‘rinbosari pora bilan qo‘lga tushdi

Jizzax viloyat Moliya boshqarmasi boshlig‘i o‘rinbosari Sh.K. 1200 AQSh dollari va 4 mln. so‘m pora bilan qo‘lga tushdi. Bu haqda Jizzax viloyat huquqni muxofaza qiluvchi organlari ma'lumotiga tayanib Sangzor.uz sayti xabar bermoqda. 

Jizzax shahrida ro‘yxatdan o‘tkazilgan “Dilorom-Shahrizoda” MChJning  Paxtakor tumanidagi “Shodlik” maktabgacha ta'lim muassasasida amalga oshirilgan qurilish ishlari bo‘yicha 2018 yil fevral oyida viloyat nazorat taftish boshqarmasi tomonidan tekshiruv o‘tkazilgan.

Tekshiruv natijasida, aniqlangan 36 mln. so‘mlik kamomadni yopib berish evaziga Jizzax viloyat Moliya boshqarmasi boshlig‘i o‘rinbosari Sh.K. firma rahbari X.X.dan 1200 AQSh dollari va 4 mln. so‘m pullarni pora sifatida olgan. Bundan tashqari, Sh.K. o‘z hovlisida hammom quraman deb, X.X.dan 1000 dona shlakoblok, 1 tonna sement va 12 dona shifer olgan.

Ammo viloyat Moliya boshqarmasi boshlig‘i o‘rinbosari Sh.K. “Dilorom-Shahrizoda” MChJning kamomadini yopa olmagach olgan pullarini bir qismi 1,5 mln. so‘mni moliya boshqarmasi arxivariusi E.G. orqali X.X.ga 2018 yil sentabr oyi boshida qaytarayotgan vaqtida viloyat DXX boshqarmasi va viloyat prokuraturasi bilan hamkorlikda jinoyat ustida qo‘lga olindi.

Hozirda, Sh.K.ga nisbatan viloyat prokuraturasi tomonidan O‘zbekiston Respublikasi JKning 168-moddasi 3-qismi “v” bandi bilan jinoyat ishi qo‘zg‘atilgan va qamoqqa olinib, tergov harakatlari olib borilmoqda.

Eslatib o‘tamiz, avvalroq Namanganda hokim o‘rinbosari pora bilan qo‘lga olingandi.