O‘zbekiston Pasportlar indeksida 82-o‘rinni egalladi

Henley & Partners kompaniyasining yangilangan Pasportlar indeksida (Passport Index) O‘zbekiston 82-o‘rinni egalladi. Avvalroq, O‘zbekiston 76-o‘ringa joylashtirilgandi.

Henley & Partners kompaniyasining yillik Pasportlar indeksi jahonning 200dan ortiq davlatlari va hududlaridagi vizalar qoidalarini tahlil qiladi hamda ularni vizasiz chiqiladigan mamlakatlar soni bo‘yicha ajratib chiqadi.

Henley & Partners kompaniyasi barcha mamlakatlar va hududlardagi viza tartib-qoidalarini diqqatlik bilan o‘rganib chiqdi hamda harakatlanish erkinligi darajasi bo‘yicha mamlakatlar ro‘yxatini tuzdi.

Indeksga ko‘ra, O‘zbekiston fuqarolari vizasiz 59 mamlakatga borishlari mumkin.

Reytingda birinchi o‘rin Yaponiyada. Yaponiya pasporti bilan dunyoning 190 mamlakatiga vizasiz sayohat qilish mumkin. Ikkinchi o‘rin Germaniya va Singapurga berildi (189 mamlakat). 

Eslatib o‘tamiz, avvalroq O‘zbekiston Respublikasida pasport tizimi to‘g‘risidagi nizomga o‘zgartish va qo‘shimchalar kiritish haqidagi prezident farmoni qabul qilingandi.