Tahlil Numbeo platformasining 2026-yil avgust oyidagi hayot sifati indeksi maʼlumotlariga asoslangan. Infografikadagi 100 ta shahar Numbeo maʼlumotlar bazasiga kiritilgan jami 306 ta shahar orasidagi oʻrniga qarab joylashtirilgan.
Mualliflar hayot sifati va yashash xarajatlarini alohida baholashga harakat qilgan. Shu sababli hayot sifati hisob-kitobidan narxlar bilan bevosita bogʻliq koʻrsatkichlar chiqarib tashlangan. Bu yashashning arzon yoki qimmatligi natijaga ikki marta taʼsir koʻrsatishining oldini oladi.
Hayot sifati baholanganda xavfsizlik darajasi, tibbiy xizmatlardan foydalanish imkoniyati, transport va tirbandlik bilan bogʻliq vaziyat, havoning ifloslanishi hamda iqlim kabi omillar hisobga olingan.
Tahlil natijalariga koʻra, hayot sifati yuqori va yashash xarajatlari nisbatan maqbul boʻlgan eng jozibador guruhga 18 ta shahar kirgan. Ular orasida Yevropa shaharlari salmoqli oʻrin egallagan.
Xususan, Vena, Portu, Split, Valensiya, Praga, Lissabon, Bratislava, Riga va Varna hayot sifati hamda xarajatlar oʻrtasidagi nisbat eng maqbul boʻlgan shaharlar qatorida qayd etilgan.
Bu natija Yevropa mamlakatlarining boshqa xalqaro hayot sifati reytinglarida ham muntazam yuqori oʻrinlarni egallashi bilan uygʻun.
Tahlilda taʼkidlanishicha, hayot sifati faqat aholi daromadlari bilan belgilanmaydi. Nisbatan hamyonbop tibbiy xizmat, rivojlangan jamoat transporti, ixcham shahar infratuzilmasi va xavfsizlikning yuqori darajasi kundalik hayot qulayligini sezilarli oshirishi mumkin.
Bunda aholining xarajatlari AQShning ayrim yirik shaharlaridagi kabi yuqori boʻlishi shart emas. Ayrim hollarda Yevropa shaharlarida yashash AQShga qaraganda arzonroqqa tushishi mumkin. Ayniqsa, tibbiy xizmatlar va kundalik ehtiyojlar uchun sarf-xarajatlar hisobga olinganda bu farq yaqqolroq koʻrinadi.
Biroq mualliflar bu ustunlik Yevropaning barcha shaharlariga birdek taalluqli emasligini ham qayd etgan. Yashash xarajatlari mamlakat va shaharga qarab keskin farq qilishi mumkin.
Reytingning kuchli yuztaligiga Rossiyaning beshta shahri ham kiritilgan. Bular - Moskva, Sankt-Peterburg, Nijniy Novgorod, Kaliningrad va Yekaterinburg.
Shu bilan birga, tadqiqot natijalarini mutlaq koʻrsatkich sifatida qabul qilmaslik tavsiya etilgan. Chunki Numbeo indeksi asosan foydalanuvchilar tomonidan taqdim etiladigan maʼlumotlarga tayanadi.
