Buyuk Britaniyada o‘z joniga qasd qilish holatlari bilan kurashadigan vazir tayinlandi

Buyuk Britaniyada o‘z joniga qasd qilish holatlari oldini olish bo‘yicha vazir paydo bo‘ldi.

Buyuk Britaniya bosh vaziri Tereza Mey sog‘liqni saqlash vaziri Jaklin Doyl-Praysni bu lavozimiga tayinladi. Bu haqda mamlakat hukumati saytida xabar qilingan.

O‘z joniga qasd qilish bilan kurashish vaziri lavozimining paydo bo‘lishiga sabab - har yili Buyuk Britaniyada taxminan 4500 kishi o‘z joniga qasd qiladi. 45 yoshgacha bo‘lgan erkaklar orasida bu o‘lim holatlarining asosiy sababidir.

Yangi vazirning vazifalari orasida hukumat, mahalliy boshqaruv organlari, o‘z joniga qasd qilish masalasi bo‘yicha mutaxassislar, xayriya tashkilotlari va o‘z joniga qasd qilish holatlaridan jabrlangan shaxslar bilan ishlash kabilar bor.