AQSh Rossiya bilan raketa kelishuvidan chiqadi, Moskva harbiy javob qaytarish bilan tahdid qildi

AQSh prezidenti Donald Tramp Qo‘shma Shtatlar o‘rta va qisqa masofalarga uchuvchi raketalar bo‘yicha shartnomadan chiqishini ma'lum qildi.

Amerikaliklar rahbari «Rossiya bu kelishuvni ko‘p vaqtdan buyon buzib kelayotgani»ga javoban shunday qadam tashlaganini bildirgan.

«Biz mazkur kelishuvni bekor qilmoqchimiz, keyin Rossiya va Xitoy yangi kelishuvga rozi bo‘lmagunga qadar qurollanishni rivojlantirishda davom etamiz», degan u.

Rossiya Tashqi ishlar vazirligi bu bayonotga tahdidona javob qaytardi.

TIV rahbari o‘rinbosari Sergey Ryabkovning qayd etishicha, amerikaliklar xalqaro kelishuvlardan o‘ta qo‘pollik bilan chiqmoqda. Misol tariqasida Eron bo‘yicha yadroviy kelishuvidan Xalqaro pochta ittifoqigacha kelishuvlar keltirilgan.

«Amerikaliklarda Rossiyani bu kelishuvni buzgani haqida ayblash uchun asos yo‘q», degan diplomat.

«Bu holda biz javob choralari qo‘llashga majbur bo‘lamiz. Xususan, harbiy-texnik xarakterdagi choralar. Ammo ish bungacha yetib borishini istamaymiz», —  deya qo‘shimcha qilgan u.

TIV rahbari o‘rinbosari 22 oktabr kuni AQSh prezidentining milliy xavfsizlik bo‘yicha maslahatchisi Jon Bolton Moskvaga kelib, Rossiya prezidenti Vladimir Putin, Tashqi ishlar vaziri Sergey Lavrov hamda Xavfsizlik kengashi bosh kotibi Nikolay Patrushev bilan uchrashishini ma'lum qilgan.

O‘rta va qisqa masofalarga uchuvchi raketalar bo‘yicha shartnoma 1987 yilda sobiq ittifoq prezidenti Mixail Gorbachev va AQSh prezidenti Ronald Reygan o‘rtasida tuzilgan. Bu kelishuv tomonlarga 500 kilometrdan 5,5 ming kilometr masofaga harakatlanuvchi ballistik va qanotli raketalarga ega bo‘lishga ruxsat bermaydi. Moskva va Vashington doimiy ravishda bir-birini bu kelishuvni buzishda ayblab keladi.

1991 yilda kelishuv to‘liq bajarilgan. Sobiq ittifoq kelishuv doirasida 1752ta, AQSh esa 859ta ballistik raketani yo‘q qilgan.

Hujjatning amal qilish muddati cheklanmagan. Biroq tomonlardan har biri kelishuvni bekor qilish zarurligiga ishonchli dalillarni keltirgan holda undan chiqish huquqiga ega.