O‘zbekiston o‘smirlar o‘rtasidagi shaxmat olimpiadasida AQShga mag‘lub bo‘ldi

Turkiyaning Konya shahrida 16 yoshgacha bo‘lgan o‘smirlar o‘rtasida shaxmat bo‘yicha Butunjahon olimpiadasi davom etmoqda.

O‘zbekiston terma jamoasi 4-raundda AQSh termasiga 2,5 -  1,5 hisobida imkoniyatni boy berib qo‘ydi.

Nodirbek Abdusattorov (2560) birinchi doskada David Brodskiyga (2415) qarshi durang o‘ynadi.

Nodirbek Yoqubboyev (2549) ikkinchi doskada Xans Nimannga (2439) mag‘lubiyatga uchradi. Javohir Sindorov (2513) uchinchi doskada raqibi Vesli Vangga (2248) yutqazdi. Shamsiddin Vohidov (2456) to‘rtinchi doskada Akshita Gorti (2308) ustidan zafar quchdi.

Yakuniy hisob: AQSh foydasiga 2,5 – 1,5.

Eslatib o‘tamiz, avvalroq o‘zbekistonlik yosh iqtidor egalari Polsha, Moldova va Vengriya terma jamoalarini mag‘lubiyatga uchratishgandi.