Yevropa Ligasida pley-offning barcha ishtirokchilari ma'lum: ustunlik hamon ispanlarda

Yevropa Ligasining guruh bosqichi o‘z yakuniga yetdi. Kecha keyingi bosqichda kurashni davom ettiradigan 11ta jamoa nomi ma'lum bo‘ldi.

6-tur natijalariga ko‘ra yana 11 klub pley-off yo‘llanmasini qo‘lga kiritdi: «Vilyarreal», «Sevilya», «Krasnodar», BATE, «Renn», «Malme», «Rapid», «Olimpiakos», «Seltik», «Slaviya», «Genk».

Ushbu 13ta klub muddatidan oldin minimum vazifani uddalab bo‘lgan edi: «Arsenal», «Ayntraxt», «Dinamo» Zagreb, «Dinamo» Kiyev, «Red Bull Zaltsburg», «Zenit», «Chelsi», «Latsio», «Sporting», «Fenerbaxche», «Bayyer», «Betis», «Tsyurix».

Chempionlar Ligasida guruh bosqichini uchinchi o‘rinda yakunlagan jamoalar endilikda Yevropa Ligasi sovrini uchun kurashga qo‘shiladi: «Bryugge», «Inter», «Napoli», «Galatasaray», «Benfika», «Shaxter», «Viktoriya» va «Valensiya».

Ikkinchi darajali yevrokubok musobaqasi pley-offida Ispaniyadan 4ta klub qatnashadi, bu – boshqa ligalar bilan taqqoslaganda eng yuqori ko‘rsatkich. La Liganing uchala vakili – «Vilyarreal», «Sevilya» va «Betis» o‘z guruhlarida peshqadamga aylanishdi, «Valensiya» esa YeChLdan kelib qo‘shiladi.

Eslatib o‘tish joiz, turnirda ispan klublari barchadan ko‘p – 11 marotaba bosh sovrinni qo‘lga kiritgan.

1/32 final bosqichi juftliklari 17 dekabr, dushanba kuni qur'a tashlash orqali aniqlanadi. Bosqichning ilk o‘yinlari 14 fevralda, javob uchrashuvlari esa bir haftadan so‘ng bo‘lib o‘tadi.