Yoshi kattalar og‘riqqa dosh beradi, ammo 5 oylik go‘dak-chi?.. Abdusolihga zudlik bilan ko‘mak zarur

Inson o‘zi xastalansa-bir azob, hali go‘dak farzandining xastaligini ko‘rib-bilib unga davo topa olmaslik esa ming azobdir. Bu murg‘ak qalb egalari salgina bezovta bo‘lsa ham jonimiz bo‘g‘zimizga keladi, biroq jiddiy dard bilan xastalansa-chi? Buni tasavvur qilishning o‘zi azobli, shunday emasmi? Kun.uz ijodiy guruhi shunday azobni boshidan o‘tkazayotgan oilaning daragini eshitdi va ularning xonadoni tomon yo‘lga otlandi.

5 oylik farzandi Abdusolihning jigar sirrozidan aziyat chekayotganligi sababli otasi Akmal Dehqonov tahririyatga murojaat yo‘llagan edi.

Video: Mover (tas-x)

Video: Youtube

{Yii::t(}

O'tkazib yuborish 6s

O'tkazib yuborish

«O‘g‘limiz Abdusolih sariqlik bilan tug‘ildi. Keyinchalik ahvoli yaxshilanmadi, aksincha yomonlashdi. Shifoxonada qo‘ldan kelgancha davolanishni o‘tamoqda. Respublika pediatriya markazida 3 marta yotdik. Farzandimga jigar sirrozi tashxisi qo‘yildi. Allohdan umid qilib turibmiz. Bolamizni transplantatsiyaga buyurishgan. Bu esa chetda (Hindiston) bo‘lar ekan. Abdusolih 5 oylik. Ahvoli kundan-kunga yomonlashib, qorni kattalashib bormoqda. Donorlikni o‘zimiz qilamiz. Shunda ham operatsiyaga 30 ming AQSh dollari ketar ekan. Hozirda bisotimda avtomobilim bor. Sotuvga qo‘yganman. Ammo, mablag‘ katta...

Savob ilinjida yordam qiladigan insonlardan umiddamiz», – deydi ko‘z yoshlarini tiyolmayotgan ota.

Bemorning holati haqida aniqroq ma'lumot olish maqsadida Abdusolih davolanayotgan Respublika pediatriya ilmiy markaziga bordik. U yerda bemorning shifokori, pediatr Dilshod Yusupov bilan uchrashishdik.

«Bemor 2018 yil 15 avgustda tug‘ilgan. Bizga oktabr oyida murojaat qilgan. Murojaat vaqtida tug‘ma gepatit va o‘t yo‘llari diskineziyasi bilan kelishgan. Kelganida to‘liq diagnostika bo‘lmagani tufayli bu yerda tekshirdik. Tekshiruv mutaxassislar bilan birgalikda olib borildi. Shundan so‘ng, biliar jigar sirrozi tashxisini qo‘ydik. Davolanishni keyingi bosqichi jigar transplantatsiyasi, qisman almashtirishga kelishildi. Shu sababli, jigarni qisman ko‘chirib o‘tkazish tavsiya qilinadi. Transplantatsiyadan keyingi dispanser nazorati o‘zining turar joyidagi va bizning shifokorlar nazoratida bo‘ladi», – deydi oliy toifali shifokor Dilshod Yusupov.

Hayot sinov uchun berilgan bir ne'mat. Har birimiz bu foniyda, albatta turli darajada sinovdan o‘tamiz. Bu sinovlardan o‘tishda Parvardigor kimnidir sababchi qiladi. Azizlar! Bu yurtdagi har bir yosh, har bir farzand biz uchun begona emas. Yorug‘ olamni ko‘rganiga hali ko‘p bo‘lmagan Abdusolih og‘ir dard bilan kurashmoqda. Jajji chaqaloqning hayotini saqlab qolaylik. Ushbu oila va norasida go‘dakni berilgan sinov va azoblardan o‘tishiga ko‘mak beraylik.

Ushbu xayriya aksiyasi bemor Abdusolihning vafot etganligi sababli tugatilgan. Ko‘mak berish maqsadida qilgan xolis niyatingiz uchun tashakkur.

Bahodir Ahmedov

Hurmatli "UZCARD" kartochka egalari! "UZCARD" tizimi sizni ogohlantiradi!

Hech kimga va har qanday vaziyatda plastik kartangizga taalluqli ma'lumotlarni, ayniqsa telefon raqamingizga kiruvchi SMS xabarlarni (masalan, To'lovni tasdiqlash kodi: 123456. Kodni hech kimga bermang" yoki "Kod oplati. Nikomu ne soobshayte etot kod. 123456") oshkor qilmang. Sizga yordam pulini plastik kartochkasidan o‘tkazib berayotgan noma'lum shaxs telefon orqali murojaat qilib mobil telefoningizga kelib tushayotgan SMS — kodlar to‘g‘risidagi ma'lumotlarni bilmoqchi bo‘layotganini sezgan bo‘lsangiz, bilingki ushbu shaxs firibgarlik yo‘li bilan kartochka hisob raqamingizdagi pul mablag‘larini o‘g‘irlashga urinmoqda. Agar karta hisob raqamingizdan pul mablag‘lari o‘g‘irlanayotganini sezgan bo‘lsangiz darhol kartochkangizni olgan bankingizga kartani bloklash uchun murojaat qilishingiz yoki ushbu amaliyotni bevosita o‘zingiz mobil yoki veb ilovada bajarishingiz mumkin.