Hukumatning 2026-yil 17-sentabrdagi 500-son qarori bilan oliy taʼlim tizimida magistratura bosqichida kadrlar tayyorlashni takomillashtirish va uning samaradorligini oshirish boʻyicha yangi tartib belgilandi.
Qarorga muvofiq, 2026-2027 oʻquv yilidan boshlab magistraturada kadrlar ikki xil dastur asosida tayyorlanadi. Ishlab chiqarish (amaliy) dasturiga yoʻnaltirilgan magistraturada oʻqish muddati kamida bir yil, ilmiy-pedagogik dasturda esa kamida ikki yil etib belgilanadi.
Magistraturada taʼlim muayyan mutaxassislikning oʻquv rejasi va dasturlariga muvofiq kunduzgi, kechki yoki masofaviy shakllarda tashkil etilishi mumkin.
Ishlab chiqarish (amaliy) dasturini tamomlayotgan magistrantlar anʼanaviy magistrlik dissertatsiyasi oʻrniga mutaxassislik xususiyatidan kelib chiqib amaliy ish tayyorlaydi. Bu loyiha ishi, konstruktorlik loyihasi, startap loyihasi, ratsionalizatorlik gʻoyasi, amaliy-ijodiy asar yoki boshqa turdagi ish boʻlishi mumkin. Bitiruvchi tayyorlagan ishini himoya qilishi talab etiladi.
Ilmiy-pedagogik dastur boʻyicha tahsil olgan magistrantlar esa magistrlik dissertatsiyasini tayyorlaydi. Dissertatsiya dastlabki himoyaga qadar plagiatga tekshiriladi va «yashirin ekspert taqrizi»dan oʻtkaziladi.
Shuningdek, Scopus va Web of Science maʼlumotlar bazalariga kiritilgan jurnallarda ilmiy maqola chop etgan magistratura talabalarini belgilangan tartibda ragʻbatlantirish nazarda tutilgan.
Oliy taʼlim, fan va innovatsiyalar vazirligi magistraturada oʻqish davomiyligini mutaxassisliklarning oʻziga xos xususiyatlaridan kelib chiqib muvofiqlashtiruvchi organ sifatida belgilandi.
Yangi tartib ayrim oliy taʼlim muassasalariga tatbiq etilmaydi. Xususan, Odil sudlov akademiyasi, Davlat siyosati va boshqaruvi akademiyasi, Bank-moliya akademiyasi, Vazirlar Mahkamasi huzuridagi Biznes va tadbirkorlik oliy maktabi, Toshkent davlat yuridik universiteti, shuningdek, oliy harbiy va harbiylashtirilgan taʼlim tashkilotlari bundan mustasno.
