Америка президентининг миллий хавфсизлик масалалари бўйича маслаҳатчиси Жон Болтон билдиришича, Қўшма Штатлар Николас Мадуро ҳукуматига босим ўтказиш учун барча имкониятлардан фойдаланишда давом этади. Бу ҳақда у твиттердаги ўз саҳифасида ёзган.
Болтоннинг сўзларига кўра, Америка томони «ноқонуний» ҳукуматни даромадлардан маҳрум қилишни, шунингдек, мухолифат етакчиси Хуан Гуайдо қўллаб-қувватланишини таъминлаш ниятида.
«Қўшма Штатлар Мадуро ва унинг югурдакларига Венесуэла халқи активларини талашда давом этишга имкон бермайди», - дея ёзган Болтон.
Эслатиб ўтамиз, аввалроқ Гуайдо Венесуэла ҳукумати ҳисобларини назоратга олмоқчи экани, Мадуро АҚШга жавоб ҳақида ваъда бергани хабар қилинганди.
