Katta magistral yo‘llarda piyodalar uchun yo‘l o‘tkazgichlar qurish taklif qilindi

“Mening fikrim” jamoaviy murojaatlar portalida viloyatlararo katta magistral yo‘llarda piyodalar uchun yer usti yo‘l o‘tkazgichlari (ko‘priklar) qurish to‘g‘risida petitsiya paydo bo‘ldi.

Qayd etilishicha, bugungi kunda respublika viloyatlari va tumanlarini bog‘lab turuvchi, mintaqa va respublika ahamiyatiga ega bo‘lgan yo‘llarda avtoulovlar juda ham serqatnov. Sutkaning har soatida qatnovlar deyarli uzilmaydi. Bunday yo‘llarda transport vositalari uchun belgilangan harakatlanish tezligi ham shaharlar ichki yo‘llariga nisbatan yuqori. Yo‘l yoqasida istiqomat qiluvchi aholi ushbu yo‘llarni kesib o‘tishga majbur, shuningdek yo‘llarning barcha qismi ham tungi vaqtda yoritilmaydi va tunda transport vositalari tezligi ham odatda yuqori bo‘ladi. 

“Shu sababli ayniqsa tunda ushbu yo‘l yoqasida istiqomat qiluvchi aholi katta yo‘llardan piyodalar yo‘lakchasi orqali o‘tishga ham qiynaladilar va o‘z jonlarini xavf ostiga qo‘yib, yo‘llarni kesib o‘tadilar. Buni esa katta yo‘llarda piyodalar ishtirokidagi YTH sonining yildan yilga oshib borayotganligi ham ko‘rsatib turibdi”, - deyiladi petitsiyada.

“Shularni inobatga olgan holda viloyatlararo katta yo‘llarning aholi serqatnov qismlarida piyodalar uchun (xuddi Toshkent shahridagidek) yer usti yo‘l o‘tkazgichlari (ko‘priklar) qurishni taklif etaman. Ushbu g‘oyani amalga oshirish uchun O‘zbekiston Respublikasi IIV, yo‘l va ko‘prik qurilish kompaniyalari maxsus reja dasturlarni ishlab chiqishi va Davlat budjeti, homiylar va xalqaro moliyaviy institutlar hisobidan loyihani moliyalashtirish manbalarini aniqlashi zarur. Shuningdek, mahalliy budjet mablag‘lari hisobidan bunday yo‘llarning piyodalar kesib o‘tish yo‘lakchalarini tungi vaqtlarda yoritilishini ta'minlash zarur”, - deb yozadi murojaat muallifi.

Eslatib o‘tamiz, avvalroq O‘zbekistonda yangi telekanal tashkil qilish taklif etilgandi.