Toshkentda mingdan ziyod haydovchi 571 million so‘mdan ortiq jarima to‘ladi - ShIIBB

30 yanvar kuni Toshkent shahar IIBB va O‘zbekiston Respublikasi Bosh prokuraturasi qoshidagi Majburiy ijro byurosi xodimlaridan tashkil topgan ishchi guruhlari yo‘l harakati qoidalarini buzib jarima to‘lamagan haydovchilarni aniqlash bo‘yicha qo‘shma tadbirlar o‘tkazishni boshlashgani haqida xabar bergan edik.

Ushbu xabar IIBBning sayti, ijtimoiy tarmoqlardagi rasmiy sahifalarida e'lon qilinganidan so‘ng, 125 nafar haydovchilar yo‘l harakati qoidalarini buzganliklari sababli jarimalarni to‘lovlarini deyari darhol amalga oshirishgan.

Toshkent shahar IIBB matbuot xizmatining bergan ma'lumotiga ko‘ra, 30 yanvar kuni jami 1.071 nafar haydovchilar o‘z jarimalarini to‘lagan, to‘langan pullarning umumiy miqdori esa 571.051.940 so‘mni tashkil etgan.

Ishchi guruhlar tomonidan 30 yanvar kuni Toshkent yo‘llarida 712 nafar jarimalar bo‘yicha qarzdorligi bo‘lgan haydovchilar aniqlangan. Natijada ular tomonidan to‘langan (yaqindagi bank filialida, elektron to‘lov tizimlari orqali) jarima miqdori 236.788.640 so‘mni tashkil etgan.

Jarima maydonchasiga 22 ta avtotransport vositalari joylangan.

“Hurmatli haydovchilar, sizlarga yo‘l harakati qoidalarini buzganlik uchun jarima to‘lovlarini o‘z vaqtida amalga oshirishni tavsiya etamiz. Bundan ham afzali — yo‘l harakati qoidalarini buzmaslik. Bu nafaqat pulingizni, balki sizning va atrofdagilarning salomatligini va hayotini asraydi”, — deyiladi Toshkent shahar IIBB murojaatnomasida.