Prezident qarori: O‘zbekistonda bolalar-o‘smirlar ot sporti maktablari tashkil etiladi

O‘zbekiston Respublikasi Prezidenti “O‘zbekiston Respublikasida yilqichilik va ot sportini yanada rivojlantirish chora-tadbirlari to‘g‘risida”gi qarorni imzoladi. Hujjat matni O‘zA tomonidan keltirilgan.

Qaror bilan O‘zbekiston Respublikasi Jismoniy tarbiya va sport vazirligi, Moliya vazirligi, O‘zbekiston yilqichilik va ot sporti federatsiyasi, O‘zbekiston Milliy olimpiya qo‘mitasi, “O‘zbekneftgaz” AJ, “O‘zbekiston temir yo‘llari” AJ va “O‘zqurilishmateriallari” AJning:

2019-2020 yillarda Qoraqalpog‘iston Respublikasi, Jizzax, Qashqadaryo, Navoiy, Samarqand, Surxondaryo, Sirdaryo, Toshkent, Xorazm viloyatlari va Toshkent shahrida davlat-xususiy sheriklik shartlari asosida bolalar-o‘smirlar ot sporti maktablarini bosqichma-bosqich tashkil etish;

O‘zbekiston yilqichilik va ot sporti federatsiyasi qoshida yuridik shaxs maqomiga ega Qorabayir zotli otlarni yetishtirish va ko‘paytirish bo‘yicha innovatsion seleksiya-genetika markazini tashkil etish;

O‘zbekiston yilqichilik va ot sporti federatsiyasi raisining o‘rinbosari – Qorabayir zotli otlarni yetishtirish va ko‘paytirish bo‘yicha innovatsion seleksiya-genetika markazi direktori lavozimini joriy etish;

Qorabayir zotli otlarni yetishtirish va ko‘paytirish bo‘yicha “Qorabayir otchilik majmuasi” UKni “Sho‘rtangazkimyo majmuasi” MChJ tasarrufidan “O‘zbekiston temir yo‘llari” AJ tasarrufiga berish;

Qorabayir zotli otlarni yetishtirish va ko‘paytirish bo‘yicha “Qorabayir otchilik majmuasi” UK va “Vodiy tulporlari” MChJ majmualarini, ular ta'minotini moliyalashtirish tartibini saqlab qolgan holda va yillik xarajatlari ko‘rsatkichlarini O‘zbekiston yilqichilik va ot sporti federatsiyasi bilan majburiy kelishish sharti bilan, Federatsiya tarkibiga kiritish haqidagi takliflari ma'qullandi.

O‘zbekiston Respublikasi Vazirlar Mahkamasi Investitsiyalar va tashqi savdo vazirligi, Moliya vazirligi huzuridagi Davlat-xususiy sheriklikni rivojlantirish agentligi, Qoraqalpog‘iston Respublikasi Vazirlar Kengashi, Jizzax, Qashqadaryo, Navoiy, Samarqand, Surxondaryo, Sirdaryo, Toshkent, Xorazm viloyatlari, Toshkent shahri hokimliklari va Federatsiya bilan birgalikda:

ikki hafta muddatda aniq yer uchastkalari va bo‘sh turgan davlat ko‘chmas mulk obektlari hududida bolalar-o‘smirlar ot sporti maktablarini tashkil etish, shuningdek, tadbirkorlik loyihalarini amalga oshirish maqsadida davlat-xususiy sheriklik shartlari asosida bolalar-o‘smirlar ot sporti maktablarini tashkil etish istagini bildirgan tadbirkorlik sub'yektlariga topshirish uchun ularning ro‘yxatini shakllantiradi;

bir oy muddatda davlat-xususiy sheriklik shartlari asosida bolalar-o‘smirlar ot sporti maktablarini tashkil etish istagini bildirgan salohiyatli tadbirkorlik sub'yektlari, shu jumladan, xorijiy investorlarni aniqlaydi;

uch oy muddatda eng yaxshi takliflarni tanlab olish asosida yer uchastkalari va bo‘sh turgan davlat ko‘chmas mulk obektlarini tashabbuskorlarga tadbirkorlik loyihalarini amalga oshirish uchun, shu jumladan, ularning bir qismida yoki alohida ajratilgan hududda bolalar-o‘smirlar ot sporti maktablarini tashkil etish bo‘yicha ijtimoiy majburiyatlarni belgilagan holda taqdim etilishini ta'minlaydi.

Belgilab qo‘yilishicha:

bolalar-o‘smirlar ot sporti maktablari birinchi navbatda ippodromlar hududida tashkil etiladi;

bolalar-o‘smirlar ot sporti maktablarining qurilishi O‘zbekiston Respublikasi Jismoniy tarbiya va sport vazirligi bilan kelishilgan loyiha-smeta hujjatlariga muvofiq amalga oshiriladi;

bolalar-o‘smirlar ot sporti maktablarining moddiy-texnik bazasini dastlabki mustahkamlash, jumladan, texnika, anjomlar va boshqa zarur vositalar bilan ta'minlash tashabbuskorlar tomonidan amalga oshiriladi;

sport otlarini sotib olish bo‘yicha xarajatlar, shuningdek, bolalar-o‘smirlar ot sporti maktablarining moddiy-texnik bazasini keyinchalik mustahkamlash bo‘yicha chora-tadbirlar o‘rnatilgan tartibda O‘zbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamg‘armasi mablag‘lari hisobidan qoplanadi;

mazkur qarorga muvofiq tashkil etilgan bolalar-o‘smirlar ot sporti maktablari O‘zbekiston Respublikasi Jismoniy tarbiya va sport vazirligining balansiga o‘tkaziladi;

bolalar-o‘smirlar ot sporti maktablarining joriy faoliyatini tashkil etish (ish haqi va unga tenglashtirilgan to‘lovlar, kommunal xizmatlar, sport otlariga ozuqa va dori-darmonlar sotib olish hamda boshqalar bo‘yicha xarajatlar) O‘zbekiston Respublikasi Davlat budjeti mablag‘lari hisobidan amalga oshiriladi;

bolalar-o‘smirlar ot sporti maktablari va sport yakka kurashlari bo‘yicha ixtisoslashtirilgan bolalar-o‘smirlar sport maktablarining ot sporti bo‘linmalari faoliyatini tashkiliy-metodik ta'minlash O‘zbekiston Respublikasi Jismoniy tarbiya va sport vazirligi tomonidan Federatsiya bilan birgalikda amalga oshiriladi.

Markaz huzurida laboratoriya tashkil etiladi va unga otlarning qon guruhini aniqlash va ma'lumotlar bazasini yaratish bo‘yicha vazifalar yuklanadi.