Samarqandda Yoshlar ittifoqi kafillikka olgan ikki mahkum sud cheklovlarini buzgani uchun ozodlikdan mahrum etildi

Samarqand tumanida yashovchi 1995 yilda tug‘ilgan A.R va 1994 yilda tug‘ilgan F.A. o‘g‘irlik jinoyati sodir etib qo‘lga tushadi. Sud jarayonida jinoyatchilarning yosh ekanligi hisobga olinib, Yoshlar ittifoqi viloyat kengashi kafilligi asosida qamoq jazosi o‘rniga ozodlikni cheklash jazosi qo‘llanilgan edi.

Sud qarori bilan mahkumlarga kech soat 22:00 dan ertalab 06:00 gacha yashash uylaridan chiqmaslik, spirtli ichimlik iste'mol qilmaslik hamda bir qator qo‘shimcha cheklovlar yuklatilgan edi. Shunga qaramasdan, har ikki yigitning yashash manzili Samarqand tuman ichki ishlar organlari probatsiya xizmati xodimlari tomonidan tungi vaqtda tekshirilganda, ular o‘z uyini tark etgani aniqlangan. Ogohlantirishga qaramasdan, bu holat yana bir martadan takrorlangan.

Bu haqda Samarqand tuman ichki ishlar organlari probatsiya xizmatining Kun.uz’ga xabar berishicha, mazkur holat yuzasidan jinoyat ishlari bo‘yicha Samarqand tuman sudining 2019 yil 21 fevral kuni D.Nuraliyev raisligida bo‘lib o‘tgan sud majlisida ikki mahkum ham aybiga to‘liq iqror bo‘lgan. Ularga belgilangan ozodlikni cheklash jazosi og‘irrog‘iga almashtirildi va ularga nisbatan ozodlikdan mahrum qilish jazosi qo‘llanildi.