Prezident Andijonda 206 ta yangi investitsiya loyihasini ishga tushirdi
Prezident Shavkat Mirziyoyev Andijon viloyatiga tashrifi doirasida 23-sentabr kuni yangi investitsiya loyihalarini ishga tushirish va ularning qurilishini boshlash marosimida ishtirok etdi.
Tadbirda umumiy qiymati 9 milliard 400 million dollar boʻlgan 206 ta loyiha qamrab olindi. Shundan 2 milliard 50 million dollarlik 98 ta loyiha ishga tushirildi, 7 milliard 350 million dollarlik 108 ta loyihaning qurilishi boshlandi. Ushbu loyihalar energetika, qurilish, toʻqimachilik, mashinasozlik, taʼlim, turizm, logistika, farmatsevtika va sogʻliqni saqlash kabi muhim sohalarga taalluqli. Ular viloyatning barcha 16 ta shahar va tumanida amalga oshiriladi.
Loyihalar Xitoy, Turkiya, Janubiy Koreya, AQSH, Rossiya, Belarus, Germaniya, Hindiston, Birlashgan Arab Amirliklari va Tojikiston kompaniyalari hamda mahalliy investorlar bilan hamkorlikda amalga oshirilmoqda.
Navoiyda bolalarni muntazam kaltaklagan xususiy bogʻcha tarbiyachisi qamaldi
Navoiyda bolalarni kaltaklab kelgan xususiy bogʻcha tarbiyachisi jinoiy jazoga tortildi. Sud hukmida aytilishicha, 23 yoshli N.E. 2025-yil dekabridan 2026-yil apreligacha qadar Navoiy shahridagi Amin kids xususiy bogʻchasida 1-3 yoshli bolalar guruhida tarbiyachi boʻlib ishlagan va 5 nafar voyaga yetmagan bolani kaltaklab, zoʻrlik ishlatgan holda qiynagan. Oqibatda bolalar yengil tan jarohati olgan.
Ijtimoiy tarmoqlarda tarqalgan videoda u bolalarga baqirgani, siltab tortib, urgani va tepganini koʻrish mumkin. Oʻrganishlar davomida u bolalarni muntazam ravishda doʻpposlab kelgani maʼlum boʻlgan.
N.E. turmush oʻrtogʻi bilan oilaviy kelishmovchilik boʻlgani sababli doim asabiy holatda yurganini, oilaviy nizolar kayfiyatiga taʼsir koʻrsatganini aytib, suddan yengillik soʻragan.
Sud hukmi bilan N.E. 2 yil bogʻchalarda tarbiyachi vazifasida ishlash huquqidan mahrum qilingan holda 3 yil 3 oy muddatga ozodlikdan mahrum qilindi.
Ayrim maktablarda tennis seksiyasi tashkil etiladi
Prezident tennisni ommalashtirish va rivojlantirishga oid qarorni imzoladi. Unga koʻra, oʻquvchilarning qiziqishi hamda mavjud sport infratuzilmasidan kelib chiqib, tennis rivojlantiriladigan maktablar tanlab olinadi.
Ushbu maktablarda tennis boʻyicha sport seksiyalari tashkil etiladi. Ularning moddiy-texnika bazasi yaxshilanib, Oʻzbekiston tennis federatsiyasi mablagʻlari hisobidan sport inventarlari, jumladan, tennis wall - tennis mashgʻulotlari uchun devor moslamalari bilan jihozlanadi.
Mashgʻulotlarni maktab joylashgan hududdagi sport maktabidan jalb etilgan murabbiylar olib boradi.
Samarqand MMTB suyuq sovunni qimmat narxda xarid qilgani aniqlandi
Samarqand viloyati maktabgacha va maktab taʼlimi boshqarmasi masʼul shaxslari 90 863 dona suyuq sovunni qimmat narxlarda xarid qilib, 1,1 milliard soʻmlik byudjet mablagʻlarini talon-toroj qilgan.
Bosh prokuratura huzuridagi Departament xabariga koʻra, holat Samarqand viloyati boshqarmasi tomonidan oʻtkazilgan tergovga qadar tekshiruvda aniqlangan.
Holat yuzasidan Jinoyat kodeksining 167-moddasi - oʻzlashtirish yoki rastrata yoʻli bilan talon-toroj qilish boʻyicha jinoyat ishi qoʻzgʻatilgan. Hozir tergov harakatlari olib borilmoqda.
Elektromobillar soni bir yilda 67 foizga oshdi
2026-yil 1-iyul holatiga koʻra, Oʻzbekistonda 122,7 mingta elektromobil roʻyxatga olingan. Bu haqda Milliy statistika qoʻmitasi maʼlum qildi. Taqqoslash uchun, 2025-yilning 1-iyul holatiga mamlakatda 73,6 ming elektromobil roʻyxatdan oʻtgandi. Bir yil ichida oʻsish 49,1 mingtani yoki 66,7 foizni tashkil etgan.
Roʻyxatga olingan elektromobillarning 72 foizdan koʻproq qismi Toshkent shahri hissasiga toʻgʻri keladi.
Shu bilan birga, elektromobillarning odamlarga tegishli transport vositalaridagi ulushi kamligicha qolmoqda.
2026-yil 1-iyul holatiga Oʻzbekistonda qariyb 5 million transport vositasi roʻyxatdan oʻtgani haqida xabar berilgan edi. Elektromobillarning undagi ulushi atigi 2,5 foizni tashkil qiladi.
